«Kanıkýly OFF-Line» tanymal franshızasy ıeleriniń jańa jobasy – «IQanat OFF-Line» telehıkaıasynyń kópten kútken tusaýkeser rásimi boldy, dep habarlaıdy Egemen.kz.
25 mınýttyq 16 serııadan turatyn telehıkaıada Qazaqstannyń úzdik mektepteriniń biri – IQanat-qa oqýǵa túsken aýyl balasynyń ómiri sýretteledi. Oqıǵa sıýjeti onyń mamandyq tańdaý týraly sheshiminiń aınalasynda qurylǵan, bul aýyl balalary úshin bilim alý múmkindiginiń mańyzyn aıshyqtaıdy.
Telehıkaıa IQanat jobasynyń seriktesi – «QAZAQSTAN» telearnasy arqyly kórsetiledi dep josparlanǵan. Sondyqtan, serıaldy kez-kelgen adam tamashalaı alady.
Jobanyń ereksheligi – oǵan qatysqan akterlerdiń 99%-yn kásibı kıno ónerinde eshqandaı tájirıbesi joq balalar, IQanat tárbıelenýshileri qurady. Oǵan qosa, hıkaıa kórinisterine mekteptiń oqytýshylary, jumysshylary, sondaı-aq, ótken jyldardaǵy mektep túlekteri túsken. Túsirilim jumystary Býrabaıdaǵy bilim mekemesiniń aýmaǵynda júrgizildi. Bul hıkaıanyń oqıǵalaryna odan saıyn jan bitirip, kórermenderdiń aıqanattyq balalar bilim alyp jatqan mekteptiń atmosferasy men rýhyn sezinýine múmkindik bergen.
«Elimizdiń ár buryshynda, eń shalǵaı aýyldarda jarqyn bolashaq týraly armandaıtyn balalar bar. Olar dáriger, ǵalym, kásipker, muǵalim bolǵandy qalaıdy. Biz bul hıkaıany osy balalar úshin túsirdik. Biz balalardyń ómirde múmkin emes eshteńe joq ekenin jáne bilim alý arqyly óz taǵdyryńdy túbegeıli ózgertýge bolatynyn bilgenin qalaımyz. Telehıkaıa jáne kıno syndy eń ózekti aqparat quraldary búgingi zaman balalaryna kóbirek úmit syılap, kúsh beredi, yntalandyrady. Biz solardyń tilinde sóıleýdi jón kórdik. Bálkim, dál osy balalar erteń bizdiń mekteptiń partasyna otyryp, óziniń búginde qoljetimsiz kórinetin eń bıik arman-maqsattaryna qol jetkizetin shyǵar», dep atap ótti jobanyń bastamashysy jáne IQanat qamqorshysy Aıdyn Rahımbaev.
Jobanyń bas prodıýseri Ernar Qurmashev bolsa, rejısseri – kınotýyndylary halyqaralyq marapattarǵa ıe bolyp júrgen Erlan Nurmuhambetov. Hıkaıany túsirýge «Aidyn&Anar Rakhimbayev Foundation» Qory úlken qoldaý kórsetti.
Tusaýkeser kezinde qonaqtar hıkaıanyń eki serııasyn tamashalap, túsirý komandasynyń áńgimelerin tyńdady.
Eske salaıyq, IQanat – 150-den astam qazaqstandyq kásipkerdiń Qazaqstannyń barlyq óńirindegi aýyl oqýshylaryn qoldaýǵa arnalǵan áleýmettik-bilim berý jobasy.
IQanat túlekteri álemniń 17 elinde bilim alýda.