Memleket basshysy áleýmettik álsiz toptaǵy azamattarǵa qoldaý kórsetýge erekshe mán berip otyrǵany aıan. El saıasatynda adamdardyń muń-muqtajyna jedel nazar aýdarý, múmkindigi shekteýli jandarǵa kómektesý negizgi basymdyqtar sanalady. Inklıýzııa, ıaǵnı teń qoǵamdy damytý, medısına men bilim, aýyldyq jerlerdi damytý syndy baǵyttardyń basyn qosqan keshendi qaǵıdany «Samuryq-Qazyna» kompanııalar toby da berik ustanady.
Jyl basyndaǵy II Korporatıvtik qaıyrymdylyq forýmynda «Samuryq-Qazyna» AQ basqarma tóraǵasy Nurlan Jaqypov 2024 jylǵy negizgi baǵyttardyń qatarynda Memleket basshysynyń tapsyrmasyna oraı, kreatıvti ındýstrııany, qazirgi zamanǵy qazaq ónerin órkendetýdi erekshe nusqaǵany belgili. Osy aıtylǵandardyń bárin qoryta kele, ulyq mereke qarsańynda, Qor tarapynan Biryńǵaı qaıyrymdylyq operatory – «Samruk-Kazyna Trust» qory arqyly birqatar iri de ilkimdi, ıgilikti is ómirge jol tartty.
Aqtóbede jańa ońaltý ortalyǵy ashyldy
22 qazanda jyl saıyn 125 erekshe balany aqysyz qabyldaıtyn mekemeni «Samuryq-Qazyna» qory «Qazaqstan halqyna» QQ, «Qamqorlyq» KQ, oblys ákimdigimen birlese iske qosty.
Aýtızmi, basqa da oı-sana kinárattary bar balalarǵa arnalǵan, zaman talabyna saı ozyq qural-jabdyq qoıylǵan kúndizgi bolý ortalyǵy Aqtóbe qalasy Sáńkibaı batyr, 171B mekenjaıynda ornalasqan.
Ortalyq 1,5 jastan 18 jasqa deıingi balalardy qabyldap, damytý sharalary men ońaltýdy ǵana emes, sonymen qatar mańyzdy áleýmettik, kúndelikti beıimdelý daǵdylaryn qamtamasyz etedi. Munda olarǵa turmystyq ádetter: tósektik oryn, dastarqan jınaý, kıim útikteý, ydys jýý, sonymen qatar tamaq daıyndaý úıretiledi. Bul balalardyń jan-jaqty jetilýine, derbes áreket ete bilýine kómektesedi.
«Erekshe bala asyrap otyrǵan ár ata-anaǵa bul ortalyqtardyń mańyzy zor. Bizdiń maqsatymyz – eldiń barlyq óńirin qamtı otyryp, erekshe balalardy jaqyn jerden qoljetimdi ári tıimdi ońaltýmen qamtamasyz etý», dedi ashylý rásiminde «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
Jetkinshekterge aǵash ustasy, qysh, tigin sheberhanalarynda dárister qarastyrylyp, osy arqyly erekshe óskeleń urpaq ókilderi bolashaqta ózin asyraýǵa kómektesetin qolóner túrlerin meńgeredi. Sondaı-aq ortalyqta adamdarmen kóz túıistirip, tikeleı aralasýdan qashqaqtaıtyn balalarǵa robot terapııasy qoldanylady. Budan tys, balalardyń damýyna ǵana emes, áleýmettenýine de septigin tıgizetin, olardyń qoǵammen etene aralasyp, tolyqqandy ómir súrýine kómektesetin lego-terapııa, art-terapııa, mýzykalyq terapııa sabaqtary usynylady.
Qor demeýshiligimen ınklıýzıvti qoǵamdy damytýǵa baǵyttalǵan «Qamqorlyq» bastamasy aıasynda sońǵy úsh jylda 43 ortalyq qoldanysqa berilse, onyń ishinde qazirgi zamanǵy qural-jabdyqpen jabdyqtalǵan jetinshi aýtızm ortalyǵy Shymkent qalasy men Pavlodar, Jetisý, Shyǵys Qazaqstan, Jambyl oblystarynan soń bıyl Qostanaı óńirinde, Aqtóbe qalasynda ashyldy.
Aqtóbede tıisti ortalyqtan bólek, «Samuryq-Qazyna» AQ kompanııalary tobynyń biryńǵaı qaıyrymdylyq operatory – «Samruk-Kazyna Trust» qorynyń qarjylandyrýymen ońaltý jáne erte aralasý ortalyqtary jumys istep, árqaısysy jylyna 600 baladan qamtyp otyr. Olarda búginde 1994 bala qabyldanyp, 153-i táı-táı basyp, alǵashqy qadamyn jasasa, al 331-i birinshi sózin aıtty.
Kreatıvti hab qazaq ónerin órkendetedi
23 qazan kúni Petropavl qalasynda Qyzyljar Creative Center ashyldy. Zamanaýı qazaq ónerin damytýdy maqsat etken shyǵarmashylyq keńistikti «Samruk-Kazyna Trust» qory arqyly «Samuryq-Qazyna» kompanııalar toby men Soltústik Qazaqstan oblysy ákimdigi birlese ómirge ákeldi.
«Kreatıvti ındýstrııa Qordyń áleýmettik saladaǵy basym baǵyttarynyń biri. О́ıtkeni ónerli jastardy IT men qazirgi zamanǵy dızaın sııaqty ózekti máselelerde demep jiberý mańyzdy ekenin túsinemiz. Bul baǵytta Qor tarapynan aýqymdy sharalar atqarylyp jatyr. Qysqa ýaqyt aralyǵynda mine, osymen ekinshi kreatıvti habty ashyp otyrmyz. Qyzyljar kreatıvti haby da qoǵamnyń mádenı sanasyn jańǵyrtyp, jergilikti talanttardy qoldaýda taptyrmas alańǵa aınalady dep senemin. Osyǵan deıingi Qazaq teatrynyń ǵımaraty aldaǵy ýaqytta da qaınaǵan shyǵarmashylyq ordasy bola berýine tilektespiz», dedi óz sózinde «Samruk-Kazyna Trust» KQ bas dırektory Alfııa Adıeva.
Soltústikqazaqstandyq 2 sharshy metr aýmaqtaǵy jańa kreatıvti habtaǵy 9 aımaqtyń árqaısysynyń ataýy men belgilengen mejesi bar: Oyu lab (dızaın, 3D-modeldeý), Santaram (grafıka dızaıny), Sandyq (kıim dızaıny), Digital nomads (SMM, marketıng), Art galam (kórmeler aýmaǵy), Qazyna (kitaphana), Orta (kovorkıng), Qainar (horeografııa), Koncerttik zal (sharalar). Tıisti aımaqtar 35 jasqa deıingi izdenimpaz ári armanshyl jas býynnyń ýaqytyn bos ótkizbeı, bilimin baıytyp, daǵdylaryn jetildirýge, óz ıdeıalaryn iske asyrýlaryna jol ashpaq. Osylaısha, «Samruk-Kazyna Trust» sońǵy 5 jylda Soltústik Qazaqstan oblysynda 600 mln teńgege 5 iri áleýmettik jobany júzege asyryp otyr.
Alǵash ret Qor demeýshiligimen Aqtóbe oblystyq S.Jıenbaev atyndaǵy jasóspirimder kitaphanasynda barlyq jastaǵy azamattarǵa arnalǵan birinshi zamanaýı keńistik qurylsa, taǵy bir kreatıvti ındýstrııa nysany Qor qoldaýymen kelesi jyly Batys Qazaqstan oblysy Oral qalasynda qoldanysqa beriledi.
Ulttyq ońaltý ortalyǵyna 73 mln teńgeniń sıfrly qural-jabdyǵy tabystaldy
Qor elordadaǵy Ulttyq balalardy ońaltý ortalyǵyn quny 73 mln teńgeden astam D-WALL robottandyrylǵan zerthanasymen qamtamasyz etti. Mundaı jabdyqtaý arqyly ortalyqtaǵy ońaltý qyzmeti jetile túspek.
Jańa tehnıkalyq qondyrǵy sal aýrýy men aýtızm syrqatyna ushyraǵan balalar men jasóspirimderge jasalatyn emniń sapasyn jaqsartady.
«Samuryq-Qazyna» kompanııalar tobynyń biryńǵaı qaıyrymdylyq operatory óz qyzmetinde medısına salasyn qoldaýǵa, ásirese balalarǵa qamqorlyqqa erekshe kóńil bóledi. Oǵan dálel, osy jyly júzege asyrylǵan jobalardyń ishinde densaýlyq saqtaý máselelerine 1 mlrd teńgeden astam qarjy baǵyttaldy.
Máselen, Qor qoldaýymen, jyl saıyn «Salamatty Qazaqstan» poıyzy aıasynda shalǵaıdaǵy aýyldarda 100 myń adamǵa tegin medısınalyq kómek kórsetip keledi. Batys Qazaqstan medısınalyq ýnıversıtetinde jańa onkologııalyq ońaltý bólimi ashylyp, Astanadaǵy N.Bátpenov atyndaǵy Ulttyq ǵylymı travmatologııa jáne ortopedııa ortalyǵyna 400 mln teńgege ozyq úlgili qural-jabdyqtar tapsyryldy.
Aýyldyq jerlerde 4 ınklıýzııa kabıneti esigin aıqara ashty
Inklıýzııa keńistikteri Qor qoldaýymen Orazaq, Qyzyljar, Qaramendi, Y.Altynsarın aýyldarynda qoldanysqa berilse, taǵy bireýin bıylǵy jeltoqsan aıynda Kókshetaý qalasynda paıdalanýǵa tapsyrý josparlanyp otyr.
Jalpy somasy 87,3 mln teńgeni quraıtyn 5 ınklıýzııa kabınetiniń jumysy nátıjesinde kem degende mektepke, balabaqshaǵa baratyn, úıden oqyp kelgen múgedektigi bar 120 bala qamtylady. Osylaısha, aýyldaǵy erekshe balalardyń basqa qatarlastarymen teń sapaly bilim alýyna jaǵdaı jasalady.
Teń qoǵamdy damytý maqsatynda joba barysynda ınklıýzııa mamandary tórt aımaqtan turatyn bólmelerde sabaqtan tys kezde jeke jáne toptyq sharalar ótkizedi. Ár balaǵa derbes baǵdarlama qarastyrylyp, muǵalimderge bir jyl boıy ádistemelik qoldaý jasalmaq.
Ár dárishana tez tozbaıtyn, búldirýge tózimdi partalarmen, ústeldermen, oryndyqtarmen, basqa da arnaıy jıhazben, bormen, markermen jazýǵa bolatyn, ınteraktıvti taqtalarmen jabdyqtalǵan. Sonymen qatar tıisti tehnıka men baǵdarlamalyq qamtamasyz etý, kompıýterler, skanerler jáne dıdaktıkalyq materıaldar, oıyn jınaqtary, dene belsendiligin shıratýǵa arnalǵan materıaldar taǵy basqa zattar bar.
Eske sala ketsek, buǵan deıin Qor óziniń biryńǵaı qaıyrymdylyq operatory – «Samruk-Kazyna Trust» KQ arqyly Astana qalasynyń 5 mektebinde ınklıýzııany qoldaý kabınetteriniń tusaýyn kesip, jyl aıaǵyna deıin olardyń sanyn 10-ǵa jetkizýdi kózdep otyr. Aqmola oblysynda «Samruk-Kazyna Trust» keıingi 4 jylda 862,6 mln teńgeniń 11 áleýmettik jobasyn júzege asyrdy.
Aldabergen KEMPIRBAI