Aýdaryspaq – salt attylardyń er ústindegi saıysy. Bul oıynǵa kúsh-qaıraty mol, batyl da tózimdi, shapshań qımyldap, at qulaǵynda oınaı biletin, at ústindegi aıqasty jaqsy meńgergen jigitter qatysady.
Al daıyndyǵy jetkiliksiz, tájirıbesi az adamǵa bul saıys ońaıǵa soqpaıdy. Ejelgi zamannan kele jatqan bul oıyn jaýgershilik kezinde naıza ustap, qylysh shabatyn jaýyngerge qajetti qasıetterdi qalyptastyrǵan. Aýdaryspaq qazirgi úlken jıyn-toılarda, merekelerde sport oıynynyń bir túri retinde kórsetilip júr.
Saıysqa qatysýshylar úsh salmaqtyq sanatqa bólinedi. Aýdaryspaqqa salmaq sanatqa engizýdiń maqsaty – qatysýshylarǵa neǵurlym teń jaǵdaı týǵyzý. Ony sporttyń bir túrine aınaldyrý úshin bir-birine teń keletin salmaqtyq sanatty kóbeıtken durys. Bul sanatqa bólý keıingi kezde qalyptasty. Ertede kez kelgen tilek bildirýshi óz erkimen qatysa beretin bolǵan. Sporttyń bul túriniń damýymen birge, sóz joq, onyń salmaqtyq sanaty da kóbeıe, keńeıe beretini kúmánsiz.
Oıynda aty beldi, jaramdy, ózi myqty, atqa otyrysy myǵym, bilekti jigitter jeńip shyǵady. Saıyp kelgende, aýdaryspaqta negizgi róldi at pen oıynshy jigitter atqarady. Attar ústindegi adamnyń yńǵaıyna beıimdelgish, arnaıy úıretilgen bolýy shart. Ospadarlyq, jula qashý, salyp qalý, qol qaıyrý sııaqty aıla-amaldardy qoldanýǵa bolmaıdy. Aýdarysý at pen jigittiń úılesimdi qımyl-birlestigine súıene otyryp, kúsh-jigerdiń basymdyǵyn kórsetetin qalypty, baısaldy sheberlikke ulasyp jatýy shart.