Raıymbek aýdanyndaǵy Kómirshi aýlynda búgingi tańda 600 adam tirshilik etedi. Olardyń 128-i mektep oqýshysy bolsa, 65-i zeınet jasyndaǵy qart kisi. Osy bir alaqandaı ǵana aýylda bıylǵy jyly tyń bastamalar men jańa jobalar júzege asyp, mundaǵy halyqtyń kóńil kúıine sony serpin berdi. Sonyń biri – jaqynda ashylǵan medısınalyq pýnkt.
Aýyl turǵyndarynyń densaýlyǵy men ál-aýqatyn jaqsartý maqsatynda el ıgiligine berilgen bul nysan «Amanat» partııasynyń saılaýaldy baǵdarlamasy aıasynda júzege asyryldy. Jalpy quny 118 239 464,34 teńgeni quraıdy.
«Kómirshige kelin bolyp túskenime 40 jyl boldy. Osy ýaqyt ishinde arnaıy medısınalyq ǵımarat tuńǵysh ret salynyp otyr. Buǵan deıin aýyldaǵy mekemelerdiń bir buryshyn panalap qyzmet kórsetetin edik. Endi, mine, jarqyraǵan aq saraıdaı ǵımaratta eńbek etý baqyty bizge de buıyrdy. Mundaǵy jaılylyq syrqattanyp kelgen adamnyń da kóńilin serpilterine senimdimiz. Aýyl turǵyndarynyń jaǵdaıyn eskerip, osyndaı nysan syılaǵan el azamattaryna alǵysymyz sheksiz», deıdi meıirbıke Mırash Ábdildaeva.
Aıtsa aıtqandaı, kómirshilikterdiń qazirgi qýanyshynda shek joq. Ǵımarat zamanaýı talapqa saı jabdyqtalǵan. Tipti medısına qyzmetkerleriniń aq halatyn jýyp, útiktep alýyna qajet avtomatty kir jýý mashınasy men útikke deıin qarastyrylǵan. Munda aq jeleńdi 3 maman turǵyndarǵa qaltqysyz qyzmet kórsetedi.
Medısınalyq pýnkttiń jobalanǵan aýmaǵy 3000 sharshy metrdi qamtıdy. Kógaldandyrý jumystary da tolyq aıaqtalǵan medpýnkt jaıly bólmelerimen, zamanaýı ınfraqurylymymen erekshelenedi. Munda orta medısına qyzmetkerleriniń kabıneti, egý kabıneti, prosedýralyq, akýsherlik qabyldaý kabıneti, múgedekter men basqa da kelýshilerge arnalǵan sanıtarlyq toraptar, dárihana pýnkti, qyzmetkerlerge arnalǵan garderob jáne jýý bólmeleri, sondaı-aq medısınalyq qaldyqtardy ýaqytsha saqtaý, quraldardy dezınfeksııalaý men daıyndaý bólmeleri bar. Mamandar medpýnktte alǵashqy kómek kórsetýge, dıspanserlik esepte turatyndarǵa taǵaıyndalǵan dári-dármek te jetkilikti ekenin aıtady.
Medısınalyq nysan ortalyqtandyrylǵan sý men jylý júıesine qosylǵan. Bul – aýyl turǵyndaryna alǵashqy medısınalyq kómek kórsetýdi jaqsartýmen qatar, aımaqtaǵy densaýlyq saqtaý qyzmetiniń sapasyn arttyra túskenin ańǵartyp otyr.
«Bıyl aýlymyzǵa aıryqsha kóńil bólinip, tabysty jyl bolyp otyr. Jeke kásipker óziniń qarjysyna hatymhana salyp berip, qazan aıynyń ortasynda paıdalanýǵa berse, endi, mine, eńseli medpýnkt ashyldy. Kómirshi aýlynyń kósheleri asfalttalyp, jaryq tartylyp, mektep jóndeýden ótip, qat-qabat ıgi isterdiń júzege asyp jatqanyna qýanyshtymyz. Aýyldyń ınfraqurylymynyń osylaısha jańǵyryp, jaqsara túsýi, eń aldymen, jastarymyzdyń týǵan jerinde turaqtaýyna, tirshilik etýine yqpal eteri sózsiz», deıdi aýyl turǵyny Dáýren Sultanbaıuly.
Almaty oblysy