Ál-Farabı atyndaǵy Qazaq ulttyq ýnıversıtetinde joǵary bilim berý máselelerine arnalǵan QS Higher Education: Asia Pacific 2024 pre-sammıti ótti. Halyqaralyq shara QS Azııa-Tynyq muhıty sammıtiniń 20 jyldyq mereıtoıyna oraı uıymdastyryldy.
Jıynǵa QS Quacquarelli Symonds saraptama agenttiginiń kommersııalyq bas dırektory Djeıson Nıýman, QR Prezıdentiniń keńesshisi Málik Otarbaev, QR Ǵylym jáne joǵary bilim mınıstri Saıasat Nurbek, Ál-Farabı atyndaǵy QazUÝ-dyń basqarma tóraǵasy – rektor Janseıit Túımebaev, Almaty qalasynyń ákimi Erbolat Dosaev, EAEO elderindegi klıenttermen seriktestik jónindegi jáne QS Jahandyq úkimetindegi aımaqtyq dırektory Sergeı Hrıstolıýbov qatysty. Sonymen qatar 150 memleketten, atap aıtqanda Qytaı, Japonııa, Indonezııa, Úndistan, Malaızııa, t.b. ózge elderden kelgen 350-ge jýyq JOO rektorlary, halyqaralyq sarapshylar jáne otandyq joǵary bilim basshylary qatysty.
Sharany Ál-Farabı atyndaǵy Qazaq ulttyq ýnıversıtetiniń rektory Janseıit Túımebaev quttyqtaý sózben ashty.
«Memleket basshysy Qasym-Jomart Toqaev: «Bilim men ǵylymǵa ozyq halyqaralyq tájirıbe aýadaı qajet. Ýnıversıtetter men ǵylymı uıymdar eldiń áleýmettik-ekonomıkalyq damýyna zor úles qosatyn strategııalyq ortalyq bolýy kerek», dep atap ótken bolatyn. Búginde jahandyq ekonomıkany damytýda ýnıversıtettik ǵylym mańyzdy ról atqaryp otyr. Jahandyq trendter men zamanaýı syn-qaterler joǵary bilimniń damýyn aıqyndaıdy. QS – álemdegi ýnıversıtetterdiń kórsetkishi men nátıjesin kórsetetin eń bedeldi halyqaralyq reıtıngterdiń biri. Sondyqtan bilikti maman daıarlaýda, ǵylymı zertteý nátıjelerin óndiriske engizýde ozyq tájirıbelerdi jetildirip otyrý qajet», dedi rektor.
О́z kezeginde QS Quacquarelli Symonds saraptama agenttiginiń kommersııalyq bas dırektory Djeıson Nıýman sharanyń Qazaqstandaǵy kóshbasshy ýnıversıtet – QazUÝ-da ótip jatqanynyń mańyzdylyǵyna toqtaldy.
«QS pre-sammıtin Qazaqstanda, sonyń ishinde kóshbasshy joǵary oqý oryndarynyń biri – Ál-Farabı atyndaǵy QazUÝ-da ótip jatqanyna qýanyshtymyn. Jahandyq máselelerdi jalǵyz sheshe almaımyz, barlyǵymyz birge jumys isteýimiz mańyzdy. Búgingi is-shara álemdegi ýnıversıtet rektorlarynyń basyn qosyp, joǵary bilim men ǵylym salasyndaǵy halyqaralyq deńgeıdegi máselelerdi sheshýge muryndyq bolyp otyr. QS reıtıngi barlyq JOO-lardyń bir-birimen tyǵyz jumys isteý, akademııalyq utqyrlyq baǵdarlamasyn damytý, ǵalymdardyń tájirıbe almasý, áleýetin arttyrý baǵytyndaǵy jumystaryn jandandyrýǵa serpin berdi», dedi Djeıson Nıýman.
Plenarlyq otyrysta Málik Otarbaev Memleket basshysy Qasym-Jomart Toqaevtyń ystyq yqylasyn jetkizdi.
«Prezıdentimiz «Ozyq oıly ultqa aınalýymyz kerek», degen negizgi maqsatty Ulttyq quryltaıda aıqyndap berdi. Ǵylym men joǵary bilimdi damytý – elimiz úshin strategııalyq mańyzy bar basymdyq. Joǵary bilim ınnovasııalyq jáne turaqty ekonomıkany qurýǵa, memlekettiń básekege qabilettiligin arttyrady. Bilikti mamandardyń bilimi men daıyndyǵyna qatysty máseleler halyqaralyq yntymaqtastyqty, dıalogty jáne tájirıbe almasýdy talap etedi. Pre-sammıt Azııa-Tynyq muhıty aımaǵynda jáne odan tys jerlerde bilim berý júıesin jetildirýge, joǵary oqý oryndarynyń básekege qabilettiligin arttyrýǵa baǵyttalǵan», dep atap ótti Málik Otarbaev.
Is-shara barysynda Ǵylym jáne joǵary bilim mınıstri Saıasat Nurbek otandyq ýnıversıtetterdiń joǵary bilim men ǵylym salasyn damytý baǵytynda júrgizip jatqan jumystary týraly baıandama jasady. Mınıstr QS álemdik reıtıngine otandyq 21 joǵary oqý orny qatysatynyn jáne jaqsy nátıjelerge qol jetkizip otyrǵanyn atap ótti.
Mınıstrdiń aıtýynsha, Qazaqstan álemdik ýnıversıtettermen seriktestikti arttyrý baǵytynda júıeli jumystar júrgizip keledi. Bul – ýnıversıtetterdiń bedelin arttyrýǵa mol múmkindik beredi. Bıylǵy oqý jylynda 30 myńǵa jýyq sheteldik stýdent Qazaqstanǵa oqýǵa keldi. Sońǵy eki jylmen salystyrǵanda 10 myń stýdentke kóp. Álemde aýqymdy úsh reıtıng bar. Eń mańyzdysy – QS halyqaralyq reıtıngi. Bul reıtıngke Qazaqstannyń 21 ýnıversıteti qatysady. Sonyń ishinde Ál-Farabı atyndaǵy QazUÝ otandyq ýnıversıtetter arasynda kósh bastap, 163-orynda tur.
Plenarlyq otyrys ǵalamdyq taqyryptarǵa arnalǵan seksııalarda jalǵasyp, QS Jahandyq úkimetindegi aımaqtyq dırektory Sergeı Hrıstolıýbov QS World University Rankings 2025 reıtıngindegi birqatar ýnıversıtetterdi marapattap, sertıfıkattar tabystady.
Azııa-Tynyq muhıty aımaǵyndaǵy joǵary bilim berý máseleleri boıynsha QS sammıti aldaǵy 5-7 qarasha kúnderi Makao qalasynda jalǵasady. Qorytyndy jıyn retinde QS pre-sammıti 8 qarashada Gonkongta ótedi dep josparlanǵan.
ALMATY