Mádenıet jáne aqparat mınıstrliginiń Qoljazbalar jáne sırek kitaptar ulttyq ortalyǵynyń uıymdastyrýymen «Tulǵa jáne tulǵa taǵylymy» atty mádenı shyǵarmashylyq kesh ótti. Oǵan kásibı tarıhshylar, mýzeı mamandary jáne zııaly qaýym ókilderi qatysty.
«Bul shara Mádenıet salasynyń úzdigi, Qazaqstannyń qurmetti jýrnalısi, zertteýshi, ólketanýshy Muhamedqalı Baımuhanovtyń 80 jas mereıine baılanysty ótkizilip otyr», deıdi uıymdastyrýshylar. Osyndaǵy mereıli kesh ıesiniń kim ekenine toqtalar bolsaq, bul kisi uzaq jyl qazaq jýrnalıstıkasynyń otymen kirip, kúlimen shyqqan.
«Baıyrǵy jýrnalıst zeınetke shyqqan soń Qoljazbalar jáne sırek kitaptar ulttyq ortalyǵynyń qorynda saqtaýly turǵan kóne jazba muralardy zerttep, ony qazaq tiline aýdaryp, ǵylymı aınalymǵa engizý úshin qajyrly eńbek jasap júr», deıdi mekeme basshysy Jandos Bekdildáuly.
Seksenniń seńgirine shyǵyp otyrǵan kóne jazbalar mamany M.Baımuhanov arab grafıkasyn, shaǵataı hám jádıt emlesin jáne tóte jazýdy jasynda óz betimen úırengen. О́ziniń aıtýynsha, ustaz aldyn kórmegen. Biraq qazirgi tańda Qoljazbalar jáne sırek kitaptar ulttyq ortalyq qorynda turǵan kóne muralardy urshyqsha ıirip júr.
Atap aıtar bolsaq, Qadyrǵalı bek Jalaıyrıdiń shejireler jınaǵyn aýdaryp, ony qundy tarıhı málimettermen tolyqtyryp, Qoja Ahmet Iаsaýıdiń 1912 jyly Qazanda basylǵan «Dıýanı hıkmet» kitabyn qazaq tiline aýdaryp, úzindiler jarııalaǵan, 1908 jyly Orynborda «Shora» jýrnalynda jarııalanǵan Shyńǵys hanǵa qatysty derekterdi qazaqsha sóıletipti.
Sondaı-aq kóne mura mamany «Arhıv-2025» jobasy aıasynda Ystanbulǵa barǵan saparynda Altaıdan – Anadolyǵa jetken qazaq kóshiniń kýágeri Zeınel Súrmeliniń tóte álipbımen jazylǵan óleńderi men hattaryn qazirgi qazaq jazýyna kóshirse, arab qarpimen terilip, jeke qolda saqtalǵan qıssalar, bılerdiń sózi, folklorlyq jyr nusqalaryn qazaq árpine kóshirip, ony «Aýyz ádebıetiniń úlgileri» degen atpen jınaq etip shyǵarypty. Ol qazirgi tańda mekeme qyzmetkerlerine kóne jazbalardy oqý ádistemesi týraly dáris oqyp júr.