Esik qalasynyń shetindegi saıajaı balalary endi alystaǵy mektepterge tasymaldanyp, áýre-sarsańǵa túspeıdi. Kúni keshe Eńbekshiqazaq aýdany Rahat aýyldyq okrýgine qarasty О́rikti aýlynan jalpy aýmaǵy 2 gektar jerge ornalasqan úsh qabatty, tıptik jobalyq qýattylyǵy 1500 oryndyq jańa mektep qoldanysqa berildi. Bul bıylǵy oqý jylynda ınvestorlar tarapynan salynǵan oblystaǵy úshinshi mektep ekenin eske salý artyq etpes. Osy kúni oblysta 447 mektep jumys istep, onda 340 myńnan astam oqýshy bilim alyp otyr.
«Kapital Construction» kompanııasy tarapynan salynǵan «Altyn adam» ınnovasııalyq mektebiniń ashylý saltanatyna saıajaı turǵyndary men ustazdar, jańa mektep tabaldyryǵyn attaǵan oqýshylar qýana qatysty.
«О́ńirdegi úsh aýysymdy mektep problemasyn sheshýde jeke ınvestorlar azamattyq tanytyp, balalarǵa jańa bilim ordasyn salyp berip otyr. «Kapital Construction» kompanııasy bıyl jyl basynda Ile aýdanynyń Ashybulaq aýyldyq okrýgine qarasty Aqjol saıajaı aýmaǵynan dál osyndaı záýlim de jaıly 1500 oryndyq mektep salyp, jerlesterimizdi qýanyshqa bólegen edi. Sol arqyly úsh aýysymdy mektep máselesi sheshilgen. Endi, mine, jańa mektepke úsh aýysymda oqytatyn №1 Rahat orta mektebiniń balalary aýysyp, atalǵan bilim ordasyndaǵy júktemeni azaıtatyn bolady», degen Almaty oblystyq bilim basqarmasy basshysynyń orynbasary Gúlsara Tastandyqyzy jańa mektep jańa múmkindikterge jol ashyp, balalardyń bilim kókjıegi keńeıýine tilektestigin bildirdi.
Jıynda «Kapital Construction» jaýapkershiligi shekteýli seriktestiginiń dırektory, mektep quryltaıshysy Rınat Tórenııaz mektep qurylysyna atsalysqan eńbek ujymyna alǵysyn bildire kelip, jańa mektepte oqıtyn oqýshylarǵa sáttilik tiledi. Sondaı-aq «Altyn adam» ınnovasııalyq mektebiniń dırektory Botakóz Bóribaıqyzyna mektep kiltin tabys etti.
«Mektebimiz – qundylyqtarǵa negizdelgen ınnovasııalyq tájirıbe engizý arqyly, álemdik básekege qabiletti tulǵa qalyptastyratyn bilim berý ortasyn qurýdy kózdeıdi. Mektepte bilim alý tegin. Sabaqtan tys ýaqytta shahmat, toǵyzqumalaq, boks, qazaqsha kúres syndy sport túrlerimen qosa, qysh, músin ónerin meńgertý úıirmeleri tegin júrgiziletin bolady. Mektep tolyǵymen materıaldyq bazamen jabdyqtalyp, bilim alýshylar úshin barlyq jaǵdaı jasalǵan. Mektepte robottehnıka, stem laboratorııalar, olımpıadaǵa daıyndyq toptary, «IELTS», «SAT» daıyndyq kýrstary, problemaǵa baǵyttalǵan oqý júıesi qarastyrylǵan. Sonymen qatar bastaýysh synyp oqýshylary men áleýmettik jaǵdaıy tómen otbasylardyń balalary tegin tamaqtanatyn bolady», dedi mektep dırektory B.Sháribek.
Eńseli mektepte II toqsandy 800-den astam oqýshy bastap ketti. Bir aýysymda 1500 bala oqýǵa múmkindigi bar ınnovasııalyq mektepke áli de bala qabyldaý jumystary jalǵasyp jatyr.
Almaty oblysy