Qazaqstan Ulttyq banki ulttyq valıýta – teńge kúnine oraı 2025 jyldyń I toqsanynda jańa «Sıfrlyq ınvestısııalyq moneta» jobasyn iske qosý jospary bar ekenin málimdedi, dep habarlaıdy Egemen.kz.
Ulttyq bank basshysy Tımýr Súleımenov Qarjygerlerdiń XII sezi barysynda «Sıfrlyq ınvestısııalyq moneta» jobasy aıasynda monetalardy Ulttyq bankke monetalardy satyp alýǵa, Ulttyq bankke keri satýǵa, syılaýǵa, sondaı-aq olardyń jetkilikti sany jınaqtalǵan kezde Ulttyq Banktiń aýmaqtyq fılıaldarynda zattaı altyn ınvestısııalyq monetaǵa aıyrbastaýǵa bolatynyn habarlady.
«Mundaı monetalardy alǵash ret 2025 jyly satyp alýǵa bolady. Biz, bir jaǵynan, tokenızasııa trendin ustanamyz, biraq sonymen birge elimizdiń barlyq ınfraqurylymyn belsendi paıdalanatynymyzdy kórsetemiz. Bizdiń negizgi bırjamyz bolatyn KASE jáne jańa quraldardy damytý turǵysynan úlken stavka jasaıtyn AIX sııaqty», dedi ol.
Ulttyq banktiń málimetinshe, altyn ınvestısııalyq monetalardy kez kelgen ýaqytta jáne álemniń kez kelgen núktesinen online satyp alýǵa jáne satýǵa bolady. Sıfrlyq balamadaǵy ınvestısııalyq monetanyń quny LBMA (London baǵaly metaldar naryǵyna qatysýshylardyń qaýymdastyǵy) belgilegen altynnyń salmaǵy men baǵasyna saı jáne Ulttyq Bank belgilegen AQSh dollarynyń teńgege shaqqandaǵy aıyrbas baǵamy negizinde teńgemen esepteletin bolady.
Aıta keteıik, monetalar Astana International Exchange (AIX) bırjasynyń «TABYS» mobıldi qosymshasy arqyly satylady.
«Osy joba úshin arnaıy jańa ÚKI ınvestısııalyq monetasynyń eksklıýzıvti dızaıny ázirlenip otyr. Onyń salmaǵy 31,1 gramm, nomınaly 100 teńge, altyn synamasy – Au 999,9. Moneta «Kóshpelilerdiń ǵıbadat janýarlary – totemderi» serııasyndaǵy kolleksııalyq monetalar stılinde jasalǵan. ÚKI ınvestısııalyq monetasyn tek «TABYS» mobıldi qosymshasy arqyly satyp alýǵa bolady. Monetalar blısterde shyǵarylady», delingen habarlamada.