Kólik-tranzıttik áleýetti odan ári damytý jáne kólik dálizderin keńeıtý maqsatynda magıstraldyq jelilerdi jappaı modernızasııalaý jumystary júrgizilýde. Osy jumystar aıasynda 2027 jylǵa deıin 1,3 myń km jańa temirjol salynady. Bul týraly Úkimet otyrysynda kólik vıse-mınıstri Maqsat Qalıaqparov habarlady, dep jazady Egemen.kz.
Búgingi tańda tıimdi tranzıttik transqurlyqtyq dálizder men baǵyttar jelisi qurylǵan. Elimizdiń aýmaǵy arqyly 13 halyqaralyq kólik dálizi ótedi, onyń 5-eýi temirjol jáne 8-i avtomobıl dálizderi.
Júk tasymalyna degen suranystyń artýyn qamtamasyz etý maqsatynda ınfraqurylymdaǵy kedergilerdi joıý boıynsha sharalar qabyldanyp jatyr. Sonymen qatar jańa jetkizý baǵyttary belsendi zerttelip, júk tasymalyn jyldamdatý úshin aqparat almasýdy qamtamasyz etetin sıfrlyq sheshimderdi engizý máselesi pysyqtalyp jatyr.
Atap aıtqanda, Transkaspıı halyqaralyq kólik dálizi baǵyty boıynsha tasymaldaýdyń oń dınamıkasy baıqalady. Sonymen birge, «Soltústik – Ońtústik» kólik dáliziniń áleýetin ashý boıynsha jumystar jalǵasyp jatyr.
«Atalǵan baǵytty damytý úshin Aqtaýda ótken birinshi kólik-saýda-eksport forýmynyń aıasynda Iran, Túrikmenstan jáne Reseımen jol kartasyna qol qoıyldy. Ol qujatty iske asyrý 2030 jylǵa qaraı dálizdiń ótkizý qabiletin 20 mln tonnaǵa deıin ulǵaıtýǵa múmkindik beredi», dedi Maqsat Qalıaqparov.
Vıse-mınıstrdiń aıtýynsha qazirgi ýaqytta «Dostyq – Moıynty» temirjol ýchaskesiniń ekinshi joldaryn, Almaty aınalma temir jolyn, «Darbaza – Maqtaaral» jáne «Baqty – Aıagóz» jańa temirjol jelilerin salý jumystary bastaldy.
Atalǵan jobalardy iske asyrý Dostyq stansasynyń ótkizý qabiletin jylyna 35 mln tonnaǵa deıin arttyrýǵa, Almaty stansasy arqyly júk ótkizý ýaqytyn qysqartýǵa, Saryaǵash stansasyn bosatýǵa jáne Qytaı baǵytyna qosymsha 20 mln tonnaǵa deıin júk ótkizý qýattylyǵyn qalyptastyrýǵa múmkindik beredi.
Tasymaldardyń úzdiksizdigin jáne magıstraldyq temirjoldardyń qýattylyǵyn arttyrý úshin Memleket basshysynyń tapsyrmasy sheńberinde 2029 jylǵa deıin 11 myń shaqyrym temirjol ýchaskelerine jóndeý jumystary júrgizilmek, onyń 2800 shaqyrymynda tıisti jumystar aıaqtaldy.
«Qabyldanyp jatqan sharalardyń nátıjesinde temirjol tasymaly boıynsha eksport 130 mln tonnaǵa deıin jetkiziledi, al ımport pen tranzıt kólemi 60% jáne 65%-ǵa deıin sáıkesinshe artady», dedi kólik vıse-mınıstri.