О́ńirdiń aýyl sharýashylyǵy salasyndaǵy ınvestorlar turǵyn úı qurylysy jónindegi shyǵyndarǵa sýbsıdııa ala almaı otyr. Aıtýlarynsha, aımaqta aýyldardyń arnaıy tizimi bekitilmegen. Al aýyldarda qazirdiń ózinde 24 úıdiń qurylysy júrip jatyr.
О́ńirlik kásipkerler palatasynyń ınvestısııalyq jobalardy súıemeldeý jónindegi front-ofısinde aýylsharýashylyq taýaryn óndirýshi «Kronos-Pavlodar» JShS men «Pobeda» JShS-nyń máseleleri qaraldy.
Bıyl jyl basynda elimizdiń О́nerkásip jáne qurylys mınıstriniń buıryǵymen aýylda, kentte nemese aýyldyq okrýgte jaldamaly turǵyn úı salǵan jumys berýshilerdiń shyǵyndaryn sýbsıdııalaý qaǵıdalary bekitilgen. Erejede jumys berýshimen salynyp, paıdalanýǵa berilgen turǵyn úı shyǵyndaryn sýbsıdııalaý qarastyrylǵan. Aldyn ala málimetterge súıensek, oblys boıynsha aýylsharýashylyq taýaryn óndirýshileri 24 úıdiń qurylysyn júrgizip jatyr. Olardyń ekeýi – joǵaryda atap ótken ınvestorlar.
Pavlodar oblysy prokýrorynyń aǵa kómekshisi Jandos Saǵatbekovtiń aıtýynsha, qurylystardy sýbsıdııalaý úshin jergilikti atqarýshy organdar aýmaǵynda ınvestorlar turǵyn úı salýdy josparlap otyrǵan aýyldardyń, kentterdiń, aýyldyq okrýgterdiń tizimin anyqtap, jergilikti ókildi organdarmen bekitýi qajet. Alaıda bul tizim bekitilmegen. Osyǵan baılanysty jergilikti atqarýshy organdar atalǵan baǵytty sýbsıdııalaı almaıdy jáne qazirdiń ózinde birqatar kedergiler bar.
Belgili bolǵandaı, «Kronos-Pavlodar» JShS bıylǵy naýryz aıynda ózderin atalǵan tizimge engizýdi ótingen. Biraq másele sol kúıi ornynan qozǵalmaǵan. Investor Aqsý qalasynyń Qanash Qamzın aýylynda qurylys júrgizilip jatqandyǵy týraly qaıtalap ótinish bergen. О́tinishti qabyldap alǵandar tizimge engiziletinin aıtypty. Alaıda aqyr sońynda tizimniń bekitilmegeni anyqtalyp otyr. «Kronos-Pavlodar» JShS-niń zańgeri Tamıla Gashımovanyń aıtýynsha, qańtar aıynan bastap kompanııa Qanash Qamzın aýylyn qurylys júrgizetin aýyldar tizimine engizý týraly birneshe hat jazǵan. «Bıylǵy 5 tamyzda Aqsý qalasynyń qurylys bólimi men Pavlodar oblysynyń qurylys basqarmasynan eldi mekenniń tizimge engiziletini týraly jaýap keldi. О́kinishke qaraı, sodan beri qosymsha eshqandaı aqparat ala almaı otyrmyz. Al turǵyn úılerdiń qurylysyn bastap ketkenbiz, qazir joba qyzý júrip jatyr», deıdi ol. Seriktestik taýarly sút fermasy ınvestısııalyq jobasy sheńberinde óz jumysshylary úshin jalǵa beriletin turǵyn úı turǵyzyp jatyr.
Mundaı máselege Sharbaqty aýdanyndaǵy «Pobeda» JShS de kezigip otyr. «Biz óz qarajatymyzdy turǵyn úıler men ózge de nysandardyń qurylysyna salyp jatyrmyz. «Pobeda» JShS Orlovka aýylyndaǵy barlyq áleýmettik salany únemi qoldaýmen keledi. О́tken jyly eki páterli bir úı paıdalanýǵa berildi. Bıyl taǵy bir baspananyń qurylysyn bastap kettik, ony 2025 jyly paıdalanýǵa beremiz. Biz aldaǵy ýaqytta tizimge enip, memleketten beriletin sýbsıdııaǵa iligemiz degen úmittemiz», deıdi seriktestik dırektory Vladımır Polıakov.
О́ńirlik qurylys basqarmasynyń basshysy Asqar Ajmurat qańtarda bekitilgen sýbsıdııalaý erejesin júzege asyrý oblysta kemshin qalǵanyn jasyrmady. О́kinishke qaraı, qurylysqa jaýapty jergilikti organdar tıisti dárejede jumys júrgizbegen. Sýbsıdııa tóleýge memlekettik mekemelerge eń aldymen aýyl tizimin bekitý qajet. Qurylys basqarmasy bul jumysty birtindep bastap, oblystyń bes óńirinde, atap aıtqanda, Aqsý qalasynda, Ertis, Aqqýly, Sharbaqty, Jelezın aýdandaryndaǵy áleýetti aýyldar anyqtalǵan. Tizimdi bekitý úshin oblystyq máslıhatqa tıisti hat joldandy.
Al oblystyq máslıhattyń tóraǵasy Ilıa Terenchenko hat tússe, máseleni kún tártibine jedeldetip shyǵaratyndaryna ýáde berdi. «15 jeltoqsan kúni 2025–2027 jyldarǵa arnalǵan bıýdjet boıynsha máslıhat sessııasy ótedi. Eger bul ótinim bizge, máslıhat depýtattarynyń beıindik komıssııasynyń qaraýyna kelse, onda da tıisti qarajat kózdelgen. Bizdiń tarapymyzdan qoldaý kórsetiledi», deıdi ol.
Oblys prokýrorynyń orynbasary Baýyrjan Ertaev qurylys basqarmasynyń basshysyna álgindeı aýyldardyń, kentterdiń, aýyldyq okrýgterdiń tizimin daıyndaýǵa bir aptalyq merzim berdi. Sondaı-aq máslıhat tóraǵasynan ınvestor kásiporyndar memleketten sýbsıdııa alý rásimin jedeldetýdi ótindi.
Pavlodar oblysy