«Qyzdyń joly – jińishke» degendeı, halqymyz qashanda qyz balanyń tárbıesine, onyń ósip-ónýine, otbasy men qoǵamdaǵy róline erekshe kóńil bólgen. Elimiz dástúrimizdegi osynaý baı rýhanı muraǵa arqa súıep, zaman talabyna saı qyz-kelinshek, áıelderdiń óz áleýetin barynsha ashýyna múmkindik týǵyzatyn saıasat júrgizip keledi.
Kórsetilgen ınfografıka elimizde áıelder mártebesin kóterýdiń tarıhı belesterin Tuńǵysh qyzdar ýchılıshesinen bastap, qazirgi zańnamalyq ózgeristerge deıin sýretteıdi. Bul tarıhı joldaǵy ár qadam áıelderdiń qoǵamdaǵy róliniń birtindep nyǵaıa túskenin aıshyqtaıdy.
1991 jyly Táýelsizdigimizge qol jetkizgennen bastap biz óz baǵytymyzdy derbes anyqtaýǵa múmkindik alyp, áıel mártebesin ulttyq saıasattyń mańyzdy baǵyty retinde damyta tústik. Respýblıkamyz qol qoıǵan halyqaralyq kelisimder men ázirlegen ulttyq strategııa-josparlar áıelderdiń saıası, ekonomıkalyq jáne qoǵamdyq ómirge belsendi ári teń qatysýynyń quqyqtyq negizin bekitti.
Osy jumystyń mańyzdy qadamy retinde 2023 jyldyń qarasha aıynda «Amanat» partııasy Áıelder qanatynyń qurylýyn atap ótse bolady. Onyń mıssııasy – áıelderdi barlyq deńgeıde qoldaý, olardyń áleýetin ashýǵa járdemdesý jáne damýyna kedergi keltiretin tosqaýyldardy joıý. Áıelder qanaty bilim, densaýlyq saqtaý, kásipkerlik, erekshe qajettilikteri bar jandardy qoldaý, quqyqtyq qorǵaý jáne genderlik stereotıpterden arylý baǵytyndaǵy jobalardy belsendi iske asyryp keledi. Ásirese aýyldy jerlerdegi áıelderdi qoldaýǵa, kásibı mansap pen otbasylyq mindetterdi úılestirýge jaǵdaı jasaýǵa, sondaı-aq qoǵamnyń úılesimdi damýynyń negizi – otbasylyq qundylyqtar men ana rólin nyǵaıtýǵa basa nazar aýdarady.
Áıelder qanaty búkil qoǵamnyń damýyna súbeli úles qosýǵa talpynady. «Balańa ýaqyt arna!», «Áıel amanaty» jáne «Tomırıs» jobalary áıelderdiń ómirde kezigetin qıyndyqtardy jeńip, óz qabiletterin ashýǵa kómektesedi.
Prezıdent Qasym-Jomart Toqaev atap ótkendeı: «Memleket árdaıym genderlik teńdikti qamtamasyz etýge, áıelderdiń quqyqtaryn qorǵaýǵa jáne otbasylyq qundylyqtardy nyǵaıtýǵa erekshe nazar aýdarady. Áıelderdiń ál-aýqaty – ultymyzdyń jarqyn bolashaǵynyń kepili».
Sholpan Karınova,
«Amanat» partııasynyń hatshysy,
Áıelder qanatynyń tóraıymy