О́tken jyly Memleket basshysy Qasym-Jomart Toqaev Batys Qazaqstan oblysyna jumys saparymen baryp, Oral qalasynda zamanaýı kópfýnksıonaldy sport keshenin salýdy tapsyrǵan edi. Prezıdent tapsyrmasy aıasynda Oral qalasynda jańa sport kesheni salynyp, paıdalanýǵa berildi, dep jazady Egemen.kz.
Sport kesheniniń ashylýyna Batys Qazaqstan oblysynyń ákimi Narıman Tóreǵalıev, QR Sport jáne týrızm mınıstri Erbol Myrzabosynov, «Qazmunaıgaz» UK AQ Basqarma tóraǵasy Ashat Hasenov, «BI Group» holdınginiń bas dırektory Ashat Omarov, sport ardagerleri men sportshylar, qala turǵyndary qatysty.
Batys Qazaqstan oblysynyń ákimi Narıman Tóreǵalıev sport kesheni Memleket basshysynyń tapsyrmasy aıasynda salynyp, óńirdegi buqaralyq sportty damytýǵa septigin tıgizetinin atap ótti.
«Prezıdentimiz Ult densaýlyǵyn nyǵaıtý jolynda buqaralyq sportty damytýdy jáne turǵyndarymyzdyń sportpen erkin shuǵyldanýyna barynsha jaǵdaı jasaý qajettigin atap ótken. Osy rette, ashylyp otyrǵan zamanaýı sport kesheni - aldaǵy ýaqytta óńir turǵyndarynyń, ásirese jastardyń sportpen shuǵyldanýyna taptyrmas oryn bolady», dedi oblys ákimi.
«Oraldaǵy jańa sporttyq-saýyqtyrý kesheni bolashaq chempıondardy tárbıeleıtin ortalyq ǵana emes, sondaı-aq turǵyndar sportpen shuǵyldana alatyn orynǵa aınalmaq. «QazMunaıGaz» áleýmettik jaýapty kompanııa retinde óz qyzmetin júrgizetin óńirlerinde áleýmettik jobalar, sonyń ishinde mektepter, balabaqshalar, medısınalyq mekemeler men sporttyq-mádenı nysandar salý boıynsha jumysty belsendi júzege asyryp keledi. Bul baǵyttaǵy jumys azamattardyń ómir súrý sapasyn arttyrý maqsatynda jalǵasyn tabady», dedi QMG basshysy Ashat Hasenov.
Jańa sport ǵımaratynda voleıbol, basketbol, fýtzal, qol doby, boks, grek-rım jáne erkin kúres, dzıýdo, sadaq atý, ústel tennısi, júzý, shyńǵa órmeleý syndy sport túrlerimen shuǵyldaný úshin barlyq jaǵdaı jasalǵan.
«Biz óte qýanyshtymyz. Osyndaı zamanaýı sport kesheni ashyldy. Endi jattyǵýlarymyzdy tek osynda ótkizemiz. Keń ári yńǵaıly ǵımarat. Jastarǵa qoldaý bildirip otyrǵan Prezıdentimizge shynaıy alǵysymyzdy bildiremiz», dedi jas sportshy Abzal Maratov.
BQO ákimdigi 2025 jyly taǵy 10 nysandy salý josparlanyp otyrǵanyn málim etti.