Oblys ákimdigi mádenıet jáne tilderdi damytý basqarmasyna qarasty tilderdi oqytý ortalyǵynyń uıytqy bolýymen «Úzdik tyńdaýshy – 2024» baıqaýy uıymdastyryldy. О́ńirlik deńgeıdegi baıqaýǵa ózge ult ókilderi qatysyp, memlekettik tilge degen qurmetin kórsetti.
Ortalyq dırektory Qýanysh Dáýrembekovtiń aıtýynsha, oblystyq baıqaýdy uıymdastyrýdaǵy basty maqsat – qazaq tili tyńdaýshylary arasynda memlekettik tildi jetik meńgerýge baýlý, olardyń boıyna ulttyq tárbıeni sińirý. Sol arqyly memlekettik tildiń qoldanys aıasyn keńeıtýge basymdyq berý – tilderdi oqytý ortalyǵynyń mıssııasy.
Joǵary deńgeıde ótken baıqaýǵa qatysýshylar «Úı tapsyrmasy» kezeńinde qazaqtyń qabyrǵaly qalamgerleriniń Otan, týǵan jer taqyrybyndaǵy otty jyrlaryn jatqa oqydy, al «Jańyldyrsań da jańylmaımyn» kezeńinde túrli jańyltpashtardy aıtyp, qazaq tilin aıtarlyqtaı deńgeıde meńgergenderin kórsetti. Sonymen qatar «Ulttyq qundylyq» dep atalatyn kezeńde qazaqtyń salt-dástúri men tuǵyrly tulǵalardyń ómir tarıhyna qatysty saýaldarǵa jaýap berdi. Ulttyq aspaptar men yrym-tyıymdarǵa qatysty oılaryn ortaǵa saldy.
Baıqaý qorytyndysynda Jambyl aýdanynan kelgen kúrd ultynyń qyzy Bası Aıdarova jeńimpaz dep tanylsa, Baızaq aýdanynan kelgen túrik qyzy Nazıra Gasanova birinshi oryndy ıelendi. Orys qyzy Zınaıda Sokolskaıa júldeli ekinshi orynǵa ıe bolsa, sarysýlyq Saıram Aıdarovaǵa úshinshi júlde buıyrdy.
Memlekettik tildiń mártebesin asyrý maqsatynda uıymdastyrylǵan baıqaýda ózge ult ókilderi qazaqtyń salt-dástúri men qalamgerleriniń shyǵarmalaryn qumartyp oqyǵanyn baıqadyq. Sol turǵydan alǵanda baıqaý údeden shyqqan sekildi.
Jambyl oblysy