«Habar» agenttigi men Respýblıkalyq ǵylymı-tájirıbelik «Daryn» ortalyǵy birlesip,«XXI ǵasyr kóshbasshysy» megajobasyn qaıta jańǵyrtýǵa kiristi. Telebáıge kóktemnen bastap «Habardyń» efırinen kórsetiledi, dep jazady Egemen.kz.
Intellektýaldyq telejoba Qazaqstan Respýblıkasynyń Mádenıet jáne aqparat mınıstrligi, Oqý-aǵartý mınıstrligi, Ǵylym jáne joǵary bilim mınıstrligi, sondaı-aq Qazaqstan Parlamentiniń Májilisi tarapynan qoldaý tapqan.
Qazirdiń ózinde júzdegen daryndy oqýshy joba shaqyrýyn qabyldap, qyzyqty ıntellektýaldyq oıynnyń qatysýshysy atandy. Ár oblystaǵy irikteý kezeńderi 2024 jyldyń qazan aıynda bastalyp 2025 jyldyń naýryzyna deıin jalǵasady. О́ńirlerden iriktelgen eń úzdik bes oqýshy respýblıkalyq kezeńge qatysýǵa múmkindik alady, ol osy jyldyń sáýirinen maýsym aıyna deıin ótedi.
Jas daryndardyń bilimderi men qabiletterin jalpy buqaraǵa kórsetýge múmkindik beretin televızııalyq joba «Habar» Agenttiginiń 30 jyldyǵyna oraı ótkizilip otyr. Eń úzdik úsh jeńimpazǵa elimizdiń joǵary oqý oryndarynda oqýǵa granttar tabystalady.
Pavlodar, Qaraǵandy, Abaı, Aqmola, Túrkistan, Jambyl, Batys Qazaqstan, Shyǵys Qazaqstan, Ulytaý, Qyzylorda, Atyraý jáne Mańǵystaý oblystarynan, sondaı-aq Astana jáne Shymkent qalalarynan respýblıkalyq týrǵa qatysatyn úzdik bestikter anyqtaldy. Almaty, Aqtóbe, Jetisý, Soltústik Qazaqstan, Qostanaı oblystarynda jáne Almaty qalasynda irikteý kezeńderi qańtar-aqpan aılarynda ótedi.
Aıta keteıik, telejoba alǵash ret 25 jyl buryn usynylǵan. Osy ýaqyt ishinde ol otandyq televızııadaǵy úzdik jobalardyń biri retinde tanyldy.