Memleket basshysy Qasym-Jomart Toqaev Prezıdent qyzmetine kiriskeli elde halyqtyń ál-aýqatyn arttyrý baǵytynda aýqymdy jumystar atqaryldy. Birqatar saıası-ekonomıkalyq reforma iske asyryldy. Memlekettik basqarý, azamattyq baqylaýdy kúsheıtý, sot jumysynda ashyqtyqty qamtamasyz etý sekildi bastamalar kóptiń kókeıindegisin dóp basty deýge bolady.
Alaıda keıingi jańa jaǵdaıdaǵy Qazaqstannyń saıası reformalarynyń damý dınamıkasynda tejeý bar. О́ıtkeni kez kelgen reformany bir Jarlyqtyń ne Zańnyń kúshimen qoǵam sanasyna sińirý múmkin emes. Eń aldymen, sanada reforma bolý qajet. Al bizdiń sanamyz 30 jyl boıy stagnasııada boldy. Endi kelip jańa reformalyq sheshimder qabyldanyp, birden ózgeris bola qalatyn, qoǵamdyq sana ol – mashına emes. Keı ózgeristerge rasymen halyq daıyn bolmady. Formasııadan ótpedik. Bizde bılik pen qoǵamnyń arasyndaǵy qarym-qatynastardyń ózindik bir zańdy erejeleri qalyptaspady. Sondyqtan reformalardy, ózgerister engizgen kezde bıliktiń tarapynan da, qoǵam tarapynan da qarym-qatynastardyń, bylaısha aıtqanda balans berý áreketterinde daıyndyq bolmaı shyqty. Qazir bul birtindep qalyptasyp kele jatyr.
Eldegi ózgeristerge, neshe túrli saıası reformalarǵa, tipti demokratııaǵa syrtqy faktorlar da óz áserin tıgizedi. Máselen, respýblıka kólemindegi keı saladaǵy kidiris álemde buryn-sońdy bolmaǵan asa kúrdeli geosaıası ahýaldyń yqpalynan bolyp otyr. Osyndaı tetikterdi tizbektesek, bizde jahan jurtymen sanasatyn jaǵdaılar kóp ekenin eskerýimiz qajet.
Odan keıin reformalardyń damý dınamıkasyndaǵy tejeý halyqtyń ál-aýqatyna tikeleı baılanysty. Qandaı da bir zańdy engizip, qujat el turǵyndarynyń turmystyq áleýetine keri áserin tıgizip otyrsa, bul tıimdi reforma dep aıta almaımyz. Sondyqtan Prezıdenttik bastamalardyń ýaqtyly nátıje kórsetpeýi, ózgerister bolmaýy ekonomıkalyq tetikterge de baılanysty.
Saıyp kelgende, saıası júıedegi seńniń qozǵalýy halyqtyń áleýmettik jaǵdaıynyń jaqsaryp, ózindik qoǵamdyq-saıası kózqarasynyń qalyptasýyna da baılanysty.
Ermurat BAPI,
Májilis depýtaty