7 aqpan «Damý kúni» aıasynda QR Prezıdenti janyndaǵy Memlekettik basqarý akademııasynyń tyńdaýshylary men qyzmetkerleri Polsha Respýblıkasynyń Qazaqstandaǵy Ýaqytsha senimdi ókili Mıhal Labendamen kezdesti. Polsha dıplomaty «Polshanyń Eýropalyq Odaq quramynda 20 jyldyǵy» taqyrybynda qazaq tilinde dáris oqydy, dep habarlaıdy Egemen.kz.
Mıhal Labenda 2004 jyldyń 1 mamyrynda Polsha Eýropalyq Odaqtyń tolyqqandy múshesi bolǵanyn, bul oqıǵanyń el úshin tarıhı kezeń ekenin atap ótti. Osy 20 jyl ishinde Polsha halyqaralyq arenada óz pozısııalaryn nyǵaıtyp, azamattarynyń ómir súrý sapasyn jaqsartyp, mańyzdy ınvestısııalar tartty.
Dıplomattyń aıtýynsha, Eýropalyq qorlar ınfraqurylymdyq jáne áleýmettik jobalardy júzege asyrýǵa múmkindik berip, bul eldiń jáne onyń astanasy Varshava qalasynyń kelbetiniń túbegeıli ózgerýine ákeldi.
Leksııanyń mazmuny men onyń qazaq tilinde ótýi tyńdaýshylarǵa úlken áser qaldyrdy. Mıhal Labenda qazaq tilin erkin meńgergen. Dıplomat tildiń halyqtyń mádenıeti men rýhyn túsinýdiń negizi ekenin aıtady.
Dıplomattyń qazaq tili men mádenıetine degen qyzyǵýshylyǵy kezdeısoq emes. 1999 jyly ol ál-Farabı atyndaǵy Qazaq ulttyq ýnıversıtetin «Shyǵystaný» mamandyǵy boıynsha úzdik bitirip, dıplomdyq jumysyn «Arab tilinen qazaq tiline baǵynyńqy qurmalas sóılemderdiń aýdarma úlgileri» taqyrybynda qorǵaǵan.
Qazaq jáne týǵan tilinen bólek, dıplomat azerbaıjan, aǵylshyn, arab, nemis, orys, ózbek jáne fransýz tilderin meńgergen.
Kezdesý sońynda Mıhal Labenda tyńdaýshylardyń suraqtaryna jaýap berip, olarǵa tabys tiledi. Akademııanyń rektory Erlan Ábil dıplomatqa qyzyqty dárisi úshin alǵys aıtyp, aldaǵy ýaqytta yntymaqtastyqqa úmit bildirdi.