Otbasy – adamzat úshin eń basty qundylyq. Alaıda qurmet pen syılastyq, senim men mahabbat ǵaıyp bola bastaǵandyqtan ba, shaǵyn memlekettiń shyrqy buzylatyn jaǵdaı azaımaı tur. Ajyrasý – qazaq qoǵamyndaǵy eń ózekti másele. Birer jyl buryn otaý qurǵan jastardyń úshten biri arada az ýaqyt ótkende nekesin buzyp jatatyny týraly derekti oqyp, tiksinip qalǵanymyz ras.
Otaý qurǵan jastardyń joly nelikten ekige aıyrylyp jatatyny – jeke bas máselesi. Áıtkenmen, ajyrasý deregi tirkelgennen keıin alıment tóleýge kelgende at-tonyn ala qashatyndar az emes. Bala aldyndaǵy boryshyn óteýden jaltarǵysy keletinderge qandaı shara qoldanylady?
Oblystyq Ádilet departamentiniń basshysy Nurǵalı Andasovtyń aıtýynsha, óńirde alıment óndirip alý jónindegi qujat sany 16 myńnan asyp ketken.
«Alıment óndirý bir rettik atqarýshylyq is sanatyna jatpaıdy. Bala kámelet jasyna tolǵanǵa deıin birneshe jylǵa sozylady. Osyny eskergen jón shyǵar. О́kinishke qaraı, keıbir boryshkerler naqty materıaldyq múmkindikke ıe bola tura, óz balasyn asyraýdan sanaly túrde jaltarady. Kirisi men múlkin jasyratyn er azamattar da barshylyq», deıdi departament basshysy.
Jeke tabysyn jasyratyndar týraly áńgimeni buryn da estıtinbiz. Endi resmı derekti bilgennen keıin er azamattar tarapynan oryn alǵan dúnıeqońyzdyq bizdi de tańǵaldyryp otyr. О́zinen aıamaǵandy týǵan balasynan aıaǵany nesi eken?
N.Andasov keltirgen derekke júginsek, sot oryndaýshylar qolǵa alǵan 16 314 alıment óndirý qujatynyń 6 177-si merzimge saı oryndalýy úshin qadaǵalaýǵa alynǵan bolsa, 9 447 azamat alımentti óz erkimen tólep jatyr eken. Al alıment tóleýden bereshegi úsh aıdan asqan 439 atqarýshylyq qujat bar. 201 problemalyq alıment boıynsha jalpy bereshek 224 658 123 teńgeni quraǵan. Bereshek somanyń 224 mln-nan asyp ketkenine qarap, árbir azamattyń moınynda orta eseppen mln-nan asa qaryz bar dep boljaýǵa bolatyn sekildi.
Birneshe jyl buryn ákeniń nemquraıdyǵy úshin alımentti ata-ájege tóletý týraly áńgime qozǵalǵan edi. Biletinder muny Italııa eliniń tájirıbesi dep aıtqany jadymyzda. Sol Italııa tájirıbesi aqyry Jambyl oblysyna da jetken sekildi. Balasynyń bereshegin ata-áje óteıtin kez de alys emes. Sondaı-aq boryshker áıelderden alıment óndirý isi de júıeli júrgizilip jatyr.
«О́ńirde jeke sot oryndaýshylar 366 áıel azamattan alıment óndirý týraly atqarý óndirisin qolǵa alǵan. Sondaı-aq apasynan alıment óndirý týraly bir atqarý óndirisi oryndaýda bar ekenin aıta ketken jón. Qazirgi tańda sot ata-apasynan bereshekti alý talap-aryzyn qarap jatyr», deıdi N.Andosov.
Alıment tóleýden sanaly túrde jaltaratyndarmen qatar, jumyssyzdyq saldarynan boryshyn óteı almaı júrgen azamattar da jetkilikti. Osy olqylyqtyń ornyn toltyrýǵa óńirde aıtarlyqtaı jumys qolǵa alynypty. Ádilet departamentiniń basshysy keltirgen málimetke súıensek, ótken jyly óńirde alıment tóleýden qaryzy bar boryshkerlerdi jumysqa ornalastyrý maqsatynda 26 jármeńke uıymdastyrylyp, nátıjesinde 228 azamat jumysqa ornalasypty. Sonymen qatar jeke sot oryndaýshylarynyń joldamasymen 153 adam túrli seriktestik pen sharýa qojalyǵyna jumysqa turǵan. Jalpy alǵanda, 381 azamat jumyspen qamtylǵan. Bul da bir ıgi is ekeni anyq.
Departament basshysy keltirgen derekter kimdi de bolsyn oılandyrmaı qoımaıdy. Árıne, otbasylyq ómirdegi máselelerdi shaǵyn memleket músheleri ózderi sheshedi. Alaıda juby jaraspaı ekige aıyrylǵan otbasylardyń alıment tóleýge kelgende jaltaryp ketýge umtylatyny janǵa batady.