«Salamatty Qazaqstan» poıyzy ótken jyly óńir-óńirdi aralap, aýyl turǵyndaryna medısınalyq kómek kórsetti. Mamyr aıynda jolǵa shyqqan poıyz jyl aıaǵyna deıin 17 oblystaǵy stasıonarlyq medısınalyq pýnkti joq aýdandarǵa qatynap úlgerdi. Medısına mamandarynan quralǵan top jumysyn sý tasqynymen alysqan eldiń batysyndaǵy ólkelerden bastaǵany da utymdy sheshim boldy.
«Samruk-Kazyna Trust» qory «Samuryq-Qazyna» kompanııalar toby atynan áleýmettik jobalardy iske asyratyn biryńǵaı qaıyrymdylyq operatory sanalady. Qor ınklıýzııa, densaýlyq saqtaý, bilim, sport, mádenıet sekildi birneshe basym baǵyttar boıynsha elimizdiń barlyq óńirinde túrli jobalardy iske asyryp keledi. Osyndaı áleýmettik mańyzdy jobalardyń biri – «Salamatty Qazaqstan» poıyzy. Joba Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, «Samuryq-Qazyna» qory, Densaýlyq saqtaý mınıstrligi, «Áleýmettik jobalar qorynyń» ózara yntymaqtastyǵy negizinde úılesim tapqan.
Medısınalyq poıyz jumysyn sý tasqynyna baılanysty batys óńirlerden bastap, Jetisý oblysynda aıaqtady. 121 stansany qamtyp, 140 shalǵaı eldi mekenge aıaldap, 21 myńnan astam shaqyrymdy júrip ótti. Burnaǵy jyly 35 maman qyzmet atqarsa, byltyr 40 maman tartyldy. Olardyń arasynda dárigerler, medıatorlar men zańgerler boldy. Sebebi uıymdastyrýshylar kem degende 100 myń halyqqa járdemdesýdi uıǵarypty. Sáıkesinshe, meje tolyǵymen oryndalyp, kómek alǵan turǵyndar sany aldyńǵy jylmen salystyrǵanda 12 myńǵa artyq bolǵan. Sóıtip, 104 250 aýyl turǵynyna medısınalyq, quqyqtyq kómek kórsetildi. Onyń ishinde dárigerler 101 myńnan astam azamatqa tegin medısınalyq kómek kórsetti. Olardyń 54 334-i áıel, 23 685-i er, 23 282-i bala.
Poıyz ár stansaǵa toqtap, jergilikti halyqqa dárigerler tolyq jalpy jáne bıohımııalyq taldaý, flıýorografııa, ishki organdar men tamyrlardy ýltradybystyq zertteý sııaqty túrli medısınalyq kómek kórsetti. Poıyzda medısınalyq qural-jabdyqtar jańartylǵan. Turǵyndardyń basym bóligi jalpy medısına dárigeri men terapevtke (77 104), nevropatolog (16 382) pen oftalmolog (15 529) syndy mamandarǵa qaralǵan. Medısınalyq poıyzda dárigerler 7671 shaǵyn operasııa jasaǵan. О́ńirler bólinisinde ońtústik pen batys ólkedegi turǵyndarǵa eń kóp medısınalyq qyzmetter usynyldy.
«Samruk-Kazyna Trust» áleýmettik jobalardy damytý qorynyń bas dırektory Alfııa Adıeva baspasóz máslıhatynda medısınalyq poıyzdyń bıylǵy nátıjeleri jóninde habarlady.
«Salamatty Qazaqstan» jobasyna ekinshi jyl qatarynan medıatorlar men zańgerler qatysty. Poıyzda 6 bilikti maman, ıaǵnı 3 zańger men 3 medıator boldy. Nátıjesinde, 2 949 azamattyń aryzy qarastyryldy, onyń 1844-i medıatorǵa túsken ótinish bolsa, 1105-i zańgerge qatysty suraqtar boldy. Barlyǵy 1630 er adam, 1 298 áıel jeke máselelerimen mamandardyń kómegine júgindi. Turǵyndardan qaryz ben bankten alynǵan nesıelerge qatysty suraq kóp túsken. Oblystar arasynda eń kóp suraq Mańǵystaý (1061), Abaı, Shyǵys Qazaqstan oblystary (466), Batys Qazaqstan (304) oblystarynyń turǵyndarynan tústi. Ańǵarǵanymyz, jyl saıyn mamandardyń qyzmetine suranys joǵarylap keledi», dedi A.Adıeva.
Elde ekinshi deńgeıli bankter men shaǵyn qarjy uıymdary aldyndaǵy ótelmegen qaryz máselesi, túrli ákimshilik-quqyqtyq daýlar ózekti bolyp otyr. 9 mln 660 myń teńge kóleminde tólenbegen 12 alıment isi boıynsha shaǵym túsken. Osy oraıda poıyz qyzmetkerleri 481 azamattyń 260 mln teńge somadaǵy nesıelerine ıkemdi keste jasaýǵa járdemdesti. 26 azamattyq, 27 qylmystyq is medıasııa aıasynda toqtatyldy. Zańger men medıator túrli áleýmettik, quqyqtyq máselelerge qatysty sotqa 120 shaǵym ázirlep, qoldaý kórsetti. Munyń bári «Salamatty Qazaqstan» medısınalyq poıyzynyń aıasynda turǵyndarǵa kórsetiletin kómek túrleri keńeıip kele jatqanyn dáleldeıdi.