Qazaqstan men Tájikstan ınvestısııalyq jobalardy keńeıtý jáne birlesken kásiporyndar qurý arqyly ekonomıkalyq yntymaqtastyqty nyǵaıtýǵa nıetti, dep habarlaıdy Egemen.kz.
«Qazaqstan men Tájikstan arasyndaǵy joǵary deńgeıde ótken byltyrǵy jylǵy kelisimder aıasynda naqty nátıjelerge qol jetkizildi. Atap aıtqanda, Qazaqstan aýmaǵynda kúnbaǵys tuqymyn óńdeıtin birlesken kásiporyn qurý máselesi qarastyryldy. О́ndirilgen ósimdik maıy keıin Tájikstanǵa eksporttalatyn bolady», dedi Tájikstannyń syrtqy ister mınıstri Sırodjıddın Mýhrıddın.
Eki el arasyndaǵy yntymaqtastyqtyń negizgi baǵyttarynyń biri – saýda salasy. 2024 jyly Qazaqstannyń Astana, Pavlodar, Shymkent, Kókshetaý jáne Qostanaı qalalarynda tájik ónimderiniń kórmeleri uıymdastyrylyp, bul óz kezeginde eksporttyń ósýine yqpal etti. Sondaı-aq, Tájikstanda jemis-kókónis ónimderin eksportqa daıyndaý maqsatynda birlesken logıstıkalyq ortalyq qurylady.
Taraptar ınvestısııalyq salada belsendi yntymaqtastyqty jalǵastyrýǵa jáne otandyq kompanııalardyń qyzmetin qoldaýǵa daıyn ekendikterin bildirdi. Aıta keteıik, búginde Tájikstanda ártúrli salada 100-ge jýyq qazaqstandyq kompanııa tabysty jumys istep jatyr.
Qazaqstan men Tájikstan arasyndaǵy ózara saýda kólemi 2024 jyly 7%-ǵa ósip, 1,2 mıllıard dollarǵa jetken. Taraptar bul kórsetkishti 2 mıllıard dollardan asyrýdy josparlap otyr.