«Qısaıǵan tal túzeýge kelmeıdi» degen. Búginde buǵanasy bekip, qanaty qatpaǵan jasóspirimderdiń keıbiriniń qatygezdikke, tártipsizdikke, jaman ádetke boı aldyrýy qoǵamda alańdaýshylyq týdyryp otyrǵanyn jasyrýǵa bolmas. Dendep engen «derttiń» aldyn alyp, oqýshylardyń zańsyzdyqqa boı aldyrmaýy úshin jan-jaqty túsindirý sharalary júzege asyrylyp jatyr. Osy maqsatta Qonaev qalasyndaǵy №3 orta mektepte «Zań men tártip ústemdigi – turaqtylyqtyń kepili» atty kezdesý uıymdastyryldy.
Is-sharaǵa polısııa ardagerleriniń tóraǵasy Qalıjan Alpysbaev pen oblystyq Polısııa departamenti jáne kadr jumysy basqarmasy bastyǵynyń orynbasary, polısııa polkovnıgi Janar Kóptileýova qatysyp, oqýshylarmen ashyq áńgime júrgizdi.
Sala mamandarynyń aıtýynsha, jasóspirimder arasyndaǵy qylmys deńgeıi úsh esege tómendegen. Dese de qylmys azaıǵanmen, quqyq buzýshylyqtyń sany artqan. Sol sebepti profılaktıkalyq sharalardy kúsheıtý kún tártibinde tur. Kezdesýde polısııa ókilderi oqýshylarǵa zańdy bilip, tártipke baǵyný jamandyqqa jol bermeýdiń kepili bolatynyn túsindirdi. Al zańdy buzý túrli keleńsizdikterge soqtyratynyn atap aıtty.
«Jyl basynan beri ata-analar komıtetiniń qatysýymen 90 kezdesý, 60 reıdtik shara ótkizildi. Jalpy, 500-den asa ákimshilik-quqyq buzýshylyq anyqtaldy. Onyń ishinde kámeletke tolmaǵan balany túngi ýaqytta qadaǵalaýsyz qaldyrǵany úshin 14 ata-ana jaýapkershilikke tartylyp jatyr. Sondaı-aq oıyn-saýyq ortalyqtarynda júretin balalardyń ata-analaryna da sharalar qoldanylyp jatyr», deıdi J.Kóptileýova.
Alaıda quqyq buzýshylyq munymen shektelmegen. Keleli kezdesýde qoǵamda beleń alǵan kıberqylmystyń 90 paıyzy jastardyń qatysýymen jasalatyny tilge tıek boldy. Oǵan ınternettiń keń taralýy men áleýmettik jelini jıi qoldanýdyń saldary keri áserin tıgizýde degen paıym bar. Kıberqylmystyń arasynda onlaın alaıaqtyq, aqparattyq qaýipsizdik buzýshylyqtary, jeke málimetterdi urlaý jáne kıberbýllıng sııaqty áreketterdiń jıi kezdesetini áńgime arqaýyna aınaldy. Osyǵan oraı jastardy durys aqparattyq ortada tárbıeleý, ınternettiń qaýip-qaterleri men quqyqtyq jaýapkershilikterin túsindirý sala mamandarynyń basty mindetine aınalǵan. Sondaı-aq bul qylmys túrin joıý úshin mektepte IT salasyn damytýdy qolǵa alý kerektigi qalys qalmady. Buǵan mektep oqýshylary da qyzyǵýshylyq tanytyp otyr.
Polısııa qyzmetkerleri quqyq buzýshylyqtyń aldyn alý úshin zań men tártipti saqtaý qajettigin, bul oraıda árbir azamattyń belsendiligi asa mańyzdy ekenin oqýshylar sanasyna sińirdi. Jas urpaqtyń quqyqtyq saýatyn arttyrýǵa yqpal etken kezdesý barysynda polısııa qyzmetiniń mańyzdylyǵy, zań ústemdigi jáne turaqtylyqtyń qoǵamdaǵy róli týraly sóz qozǵaldy. Oqýshylar ózderin qyzyqtyrǵan suraqtaryn qoıyp, quqyqtyq tártip pen qoǵamdyq qaýipsizdik máseleleri boıynsha jan-jaqty jaýap aldy.
Oqýshylarmen kezdesýde Qonaev qalasynyń qurmetti azamaty, Ishki ister salasynyń ardageri Qalıjan Alpysbaıuly óziniń ómirlik tájirıbesimen bólisti. Quqyq qorǵaý salasynda 30 jylǵa jýyq qyzmet etken ardager Keńes odaǵynyń batyry Baýyrjan Momyshulynyń «Tártipke baǵynǵan – qul bolmaıdy» degen ataly sózin alǵa tartyp, jas óskinniń tártip buzbaı, adamgershilik atty asyl qasıetti aıaqasty etpeı, ata-ana men ustazdar úmitin aqtaý qajettigin qadap aıtty. Ataly sózge den qoıǵan oqýshylar basqosýdan aıryqsha áser alyp, tarqasty.
Almaty oblysy