Memleket basshysynyń tapsyrmasy aıasynda qazaq tilindegi jasandy ıntellektti damytýǵa baǵyttalǵan KazLLM aýqymdy til modeli ázirlendi, dep habarlaıdy Egemen.kz.
Atalǵan tapsyrmany júzege asyrý aıasynda Ǵylym jáne joǵary bilim mınıstrligi Aqparattyq júıeler jáne jasandy ıntellekt ınstıtýtyn (ISSAI), ǵylymı ınstıtýttar men joǵary oqý oryndaryn tarta otyryp KazLLM ulttyq til modeline qajetti qazaq tiliniń korpýsyn qamtamasyz etý jumysyn júrgizdi.
Atalǵan shara qazaq tilindegi mátindik aqparatty óńdeý, aýdarý, taldaý jáne qazaq tilin zamanaýı tehnologııalarǵa kiriktirýge qajetti tıimdi sheshimder jasaýǵa baǵyttalǵan. Jahandaný jáne eldiń mádenı biregeıligin saqtaý jaǵdaıynda jobanyń mańyzdylyǵy tipti artyp otyr.
Atalǵan mınıstrliktiń baspasóz qyzmetiniń málimdeýinshe KazLLM-ge qajetti qazaq tilindegi korpýsty ázirleýge atsalysqan elimizdiń 26 jetekshi ınstıtýttarynyń, joǵary oqý oryndarynyń 140-tan asa ǵalymdary men qyzmetkerleri ekonomıka, qarjylandyrý, matematıka, tarıh, bıologııa, hımııa, medısına, tehnologııa jáne taǵy da basqa 115 sala boıynsha úlken kólemdegi derekterdi daıyndaýmen aınalysqan. Máselen ál-Farabı atyndaǵy Qazaq ulttyq ýnıversıteti fılosofııa, etıka, PR, astronomııa, astrofızıka, aqparattyq tehnologııa salalary boıynsha derekterdi daıyndaýmen, Matematıka jáne matematıkalyq modeldeý ınstıtýty matematıka salasy boıynsha, Sh.Ýálıhanov atyndaǵy Tarıh jáne etnologııa ınstıtýty tarıh salasy boıynsha, medısınalyq ýnıversıtetter medısına salasy boıynsha derekterdi daıyndaǵan. Ǵylym jáne joǵary bilim mekemelerimen bul yntymaqtastyq modeldiń sapaly ári tıimdi ázirlenýin qamtamasyz etetin qazaq tilindegi biregeı kontenttiń qurylýyna yqpal etken.
Búgingi kúni KazLLM-niń ashyq bastapqy kody bar nusqasy https://huggingface.co/issai platformasynda qoljetimdi.
Sıfrlyq ınfraqurylymnyń mańyzdy bóligi bolyp tabylatyn atalǵan model kommersııalyq emes ǵylymı jáne akademııalyq maqsattarda, sondaı-aq chat-bottar, vırtýaldy kómekshiler, Google Translate-ke uqsas avtomatty aýdarmashylardy ázirleýde qoldanylatyn bolady.