Búgin Qazaqstannyń halyq ártisi, memlekettik syılyqtyń ıegeri, kórnekti ánshi-kompozıtor Eskendir Hasanǵalıevtiń týǵan kúni. О́ner ıesiniń 85 jyldyq mereıtoıyna oraı onyń týǵan jeri Batys Qazaqstan oblysy Qaratóbe aýdanynyń ortalyǵynda myńǵa jýyq turǵyn jınalyp, «Atameken» ánin shyrqady.
«Qadirli ónersúıer aǵaıyn! Qaratóbe aýdany - úsh júzge án ozdyrǵan sal Muhıt, Ǵarıfolla Qurmanǵalıev, Eskendir Hasanǵalıevtaı óner maıtalmandary dúnıege kelgen qasıetti ólke. Biz, qaratóbelikter osyndaı óner maıtalmandaryn árqashan maqtan tutamyz. Búgin el maqtanyshyna aınalǵan Eskendir aǵany saǵyna eske alyp, ónerin ulyqtap, asqaq rýhyn jadymyzǵa saqtaı otyryp, «Atameken» ánin aýdan halqy bolyp birge shyrqaımyz», dedi jınalǵan toptyń aldynda Qaratóbe aýdanynyń ákimi Qadyrjan Súıeýǵalıev.
Áıgili kompozıtor men aqyn Qadyr Myrza Álıdiń shyǵarmashylyq odaǵynan týǵan «Atameken» áni – kúlli qazaqstandyqtyń júregine bekigen, týǵan jerge degen mahabbatyn, saǵynyshyn beıneleıtin shoqtyǵy bıik dúnıe.