QR Mádenıet jáne aqparat mınıstri Aıda Balaeva bar qazaqtyń qaıǵysyna ortaqtasyp, kóńil aıtty, dep habarlaıdy Egemen.kz.
«Qadirli qaýym! Qazaqtyń qaıtalanbas qalamgeri Dýlat aǵamyzdyń qazasyna oraı kúlli qazaq eline qaıǵyra kóńil aıtamyn.
Ulttyq ádebıetimizdiń ujdany, maqtanyshy, aıbary bolǵan Dýlat Isabekov qazaq prozasy men dramatýrgııasynyń kókjıegin keńeıtken, ádebıet áleminde ózindik órnek salǵan birtýar qalamger edi. Onyń shyǵarmalary talaı býynnyń sanasyna oı salyp, júregine jol taýyp, ult rýhanııatynyń qazynasyna aınaldy», dep jazdy mınıstr.
Sóz arasynda Balaeva qalamgermen kóp jyldar boıy etene jaqyn aralasyp, aqyl-keńesi men ónegesine qanyq bolǵanyn eske aldy.
«Adamı bıik qasıetterin, daladaı keń peıilin jaqynnan tanydyq. Sońǵy kezderde apamyz ómirden ótkennen keıin kóńili túsip, jany júdep júrgendeı kóringen. Otadan shyqqannan keıin Almatyda arnaıy jaǵdaıyn surap barǵanymyzda muqalmas rýhyna, bıik bolmysyna taǵy bir kýá bolyp, áli de kóp jas jasaryna tilek etip edik. Amal qansha?! Dýlat aǵamyzben birge bir dáýir kóshkendeı», – dep jazady Aıda Balaeva.
Degenmen qalamgerdiń ólmes týyndylary ýaqytpen birge jasaı bereri haq.
«Jazýshynyń ólsheýsiz eńbegi halyqtyń júreginde, jarqyn beınesi men mol murasy urpaq jadynda máńgi saqtalary sózsiz. Qazaqstan Respýblıkasy Mádenıet jáne aqparat mınıstrligi men óz atymnan jazýshynyń otbasy men týǵan-týystaryna taǵy da qaıǵyra kóńil aıtamyn. Aǵamyzdyń jany jánnatta, ımany salamat bolsyn!» - dep sózin aıaqtady QR Mádenıet jáne aqparat mınıstri Aıda Balaeva.