Árbir shyǵarmashylyq adamynyń ózine tán dara, dańǵyl joly bar. Árkim óziniń shyǵarmashylyq áleýetin árqıly kórsetip jatady. Bir qaraǵanda, kez kelgen aqyndy aıshyqtap, bólektep turatyn óleńderi bar bolǵanymen, keıde biz ómirde de, shyǵarmashylyq aıdynynda da qatar júzgen jupty bir-birinen bólip jara almaımyz.
Alashtyń aımańdaı aqyny Qaıyrbek Asanov pen Memlekettik syılyqtyń laýreaty Kúlásh Ahmetova Tarazǵa qonys aýdarǵanda, jastarmen birge biz de sálem berýge, úlkenderdiń batasyn alýǵa shańyraǵyna bas suǵyp júrdik. Otasqandaryna jarty ǵasyr bolǵan juptyń bir-birine degen qurmeti, izeti, meıirimi bizge de kóktegi kúndeı shýaǵyn shashatynyn sezinetinbiz. Sonda ǵoı, eskirmeıtin mahabbat degenimiz osy-aý sirá, dep tarqasýshy edik.
Seksenniń seńgirine shyqqan Qaıyrbek Asanov áli kúnge deıin qolynan qalamyn tastaǵan joq. Qasıetti poezııaǵa bergen sertinen taımaǵan aıtýly aqynnyń 2023 jyly «Abaı» baspasynan jaryq kórgen «Aı men kúnniń sáýlesi» atty jyr jınaǵyn oqyp otyryp, súıegine sóz qonǵan qalamgerdiń jazary taýsylmaǵanyna taǵy da kóz jetkizgendeı boldyq.
Birneshe taraýdan turatyn jańa jınaqtyń alǵashqy bólimi «Saǵan ǵashyq júrekpen» dep atalady. Júregi ǵazal jyr úshin jaralǵan aqyn birinshi bóliminde jan-jaryna degen sarqylmas mahabbatty qara óleńmen ádiptegen. Sezim pernelerin dóp basqan aqyn jyrlary adam janyn jylyta túsedi. Tórt aıaǵyn teń basqan tarmaqtar jaǵalaýda turǵan kisi júregin birde mahabbat aralyna, birde mahabbat aıdynyna tartatyn magnıttik kúshke ıe me dersiń.
«Sen jaıly án, janym-aý, salatynym,
Sen júrgen jer jaıqalyp baratynym.
Sen bolmasań ómirde
Bilesiń be?
Jan-jaryńnyń qaıǵyryp qalatynyn.
Júrgeniń de ádemi sháı qaınatyp,
Jyr oqısyń, ómirdi, eldi oılantyp.
Barlyq baılyq, mansaptyń keregi joq,
Meniń seni tapqanym qandaı baqyt!», deıdi aqyn «Sen ekeýmiz» dep atalatyn óleńinde aǵynan aqtarylyp.
Osy óleńdegi tarmaqtarǵa qarap otyryp-aq, aqynnyń aıaýly jaryna degen seziminiń sarqylmaıtynyn, mahabbatynyń máńgilik ekenin baǵamdaý qıyn emes. Syrdyń sýyn keship júrip erjetken aqynnyń Talas jaǵalaýynda ósken jan-jaryna degen qurmeti qashan da bólek ekenine ılanasyń. Jarty ǵasyrdan beri júrek otynyń sónbegenine, máńgilik mýzasyna degen adaldyǵyna tánti bolasyń.
«Sen qýansań,
Men de qatty qýandym,
Sen uıalsań,
Men de qatty uıaldym.
Ekeýmizge kún de, tún de ortaq qoı,
Sońyndamyz ekeýmiz bir qııaldyń.
Bireýler júr syrtymyzdan sóz etip,
Qate basqan kezimizdi kúzetip.
Bárine de shydaımyz-aý,
Tek qana
Ketpese eken abaısyzda kóz ótip», deıdi aqyn taǵy bir óleńinde jaryna degen jan jylýyn óleńimen sezdirip.
Janarynan meıirim nury sebezgilegen aqyn eshkimge kiná artqysy kelmeıdi. Júregine aýyr júk arqalaýǵa da zaýqy joq. О́ıtkeni ol úshin eń aýyr júk – qasıetti qara óleńge degen adaldyq. Poezııaǵa degen tazalyq ony áldekimderdiń qısynsyz áńgimesine bas aýyrtýyna múmkindik bermeıtinin ańǵarý qıyn emes. Áıtse de, syrt kózdiń sypsyń áńgimesi keýdede damylsyz soqqan júregin áredik bolsa da syzdatatyny aqıqat. О́ıtkeni aqyn júregi qyldan da názik emes pe?
«Bir bıikten bir bıik alqyndyryp,
О́mir súrgiń keledi halqyńdy uǵyp.
Aýyrtpalyq bassa da bar eńseni,
Jaıdary bop júresiń, jarqyn kúlip.
Aınaldyryp keıbireý mazaǵyna,
Daq salady kirshiksiz taza aryńa.
Qurbany bop keteıin ózim ǵana,
Aýyrtpalyq túspesin qazaǵyma», dep jyrlaǵan aqynnyń ultyn, qazaǵyn sheksiz súıetinine eshkimniń talasy joq.
Qaıyrbek Asanovtyń qara óleńge, qazaǵyna degen adaldyǵy qaı kezde de menmundalap turady. Tóńiregin túgendep júretin aqynnyń janarynan tógilip turatyn shynaıy meıirim keıingi býynnyń janyn jylyta túsedi. О́leńin ómirim dep túsingen qalamgerdiń jazbaǵan jyry áli kóp. О́ıtkeni onyń júreginde mahabbat, meıirim, qurmet degen uǵymdar qatar ómir súrip jatyr. Ǵumyryn poezııa báıteregine baılaǵan aqynnyń óleńsiz ómir súrýi múmkin emes.