Úzdik sardarlar marapattaldy

Ishki ister mınıstrliginiń «Suńqar» jáne «Tomırıs» komandalary halyqaralyq ja­rystyń kúmis júldegeri atandy. Al Ulttyq qaýipsizdik komı­tetiniń «Arystan» komandasy tórtinshi orynǵa ıe boldy. Mem­lekettik kúzet qyzmeti men Qorǵanys mınıstrliginiń komandalary da sheberliktiń úzdik úlgisin kórsetti.

Osy oraıda Qorǵanys mınıstri, general-polkovnık Rýslan Jaqsylyqov Birikken Arab Ámirlikterindegi arnaıy maqsattaǵy bólimsheler jarystaryna qatysqan birqatar ofıserge «El qorǵany» medalin tabystady. Sondaı-aq arnaıy operasııalar kúshteriniń belgisi men alǵys hattar berdi. Al erekshe kózge túsken áskerı qyzmetshiler merziminen buryn áskerı ataǵyn aldy. Osylaısha sala basshysy Arnaıy operasııalar kúshteriniń áskerı qyzmetshilerin quttyqtady.

– Mundaı halyqaralyq deń­geıdegi jarys áskerılerdiń jaýyngerlik qabiletin shyńdaýǵa, tájirıbe almasýǵa yqpal etedi. Eń bastysy elder arasyndaǵy qaýipsizdik salasyndaǵy ózara is-qımyldy nyǵaıtady. Ar­naıy operasııalar kúshteri­niń «Jaýbasar» komandasy alǵash ret elıtalyq bólimshelerdiń jarystaryna qatysyp otyr. Jarys baǵdarlamasy arnaıy polısııa kúshterine arnalǵan. Degenmen jaqsy nátıje kórsetti. Alda Iordanııadaǵy áskerı arnaıy maqsattaǵy bólimshe­ler­diń jáne Ulybrıtanııadaǵy «Kembrıı patrýli» jarystary uıymdastyrylady. Onyń nátıjelerinen sarbazdardyń kásibı daıarlyqtaryn kóre alamyz, – deıdi R.Jaqsylyqov.

Qazaqstandyq áskerı delegasııa sapary aıasynda IDEX jáne NAVDEX-2025 halyqara­lyq qorǵanys tehnologııalary kórmesiniń jumysymen tanysyp, zerdeledi. ADNEC kórme ortalyǵynda olar qarý-jaraq, áskerı tehnıka úlgilerin jáne qorǵanys maqsatyndaǵy tehnologııalar usynǵan iri áskerı-ónerkásiptik kompanııalardyń pavılondaryn aralady.

Kórme alańynda Rýslan Jaq­sylyqov BAÁ vıse-premeri jáne qorǵanys mınıstri sheıh Hamdan ıbn Muhammed Ál Mak­týmmen kezdesti. Taraptar eki­jaqty ózara is-áreket baǵyt­taryn talqylap, qorǵanys sala­syndaǵy yntymaqtastyqty damytýǵa beıildiligin rastady.

Buǵan qosa Qazaqstannyń Qorǵanys mınıstri qorǵa­nys ónimderiniń jetekshi ón­dirý­shileriniń basshylarymen kelissóz júrgizdi.