Elimizde 12 bloger óz erkimen 1,4 mlrd teńge kóleminde qosymsha tabystaryn deklarasııalap, 73,6 mln teńge salyq tóledi, dep habarlaıdy Egemen.kz.
Memlekettik kirister komıtetiniń málimetinshe, búginde barlyǵy 854 blogerge «kiristi tómendetý» boıynsha zań buzýshylyqtar úshin 71,9 mlrd teńge somasynda kameraldyq baqylaý týraly habarlamalar jiberilgen. Olardy oryndaý merzimi – 30 jumys kúni.
«71,9 mlrd teńge kólemindegi aıyrmashylyqtar tólenbegen salyqtardyń somasy emes ekenin atap ótken jón. Kórsetilgen aıyrmashylyq somalary blogerlerdiń salyq deklarasııalarynda kórsetilmegen boljamdy tabystaryn bildiredi», delingen habarlamada.
Esterińizge sala keteıik, salyqtardyń eseptelýi men tólenýi salyq zańnamasynda belgilengen tıisti stavkalar boıynsha usynylǵan deklarasııalarǵa sáıkes júzege asyrylady.
«Kameraldyq baqylaýdyń máni – salyq tóleýshige tabystaryn óz erkimen deklarasııalap, eseptelgen salyqtardy tóleýge nemese anyqtalǵan buzýshylyqtarmen kelispegen jaǵdaıda túsindirme berýge múmkindik berý», dep habarlady vedomstvodan.