«Ulttyq kınony qoldaý memlekettik ortalyǵy» 2025 jylǵy ulttyq fılmder dep tanylýǵa úmitti kınojobalardy irikteý konkýrsyn jarııalady, dep habarlaıdy Egemen.kz.
Mádenıet jáne aqparat mınıstri Aıda Balaevanyń habarlaýynsha, kınojobalardy memlekettik qoldaý konkýrsynyń jańa kezeńi bastaldy. Bul konkýrs kınojobalardy ashyq ári ádil irikteýdi qamtamasyz etý maqsatynda jańa erejeler boıynsha júzege asyrylady.
Kınojobalardy irikteý eki kezeńde júzege asady:
Konkýrstyń birinshi kezeńinde áýeli ssenarıı men ssenarıı josparlary qabyldanyp, Saraptama keńesiniń qaraýyna jiberiledi. Ekinshi kezeńde qujattar paketi qaralyp, anyqtalǵan qatelerdi túzetýge 3 kún ýaqyt beriledi. Ashyq qorǵaý jáne pıtchıng onlaın translıasııa arqyly ótedi.Aıta keteıik, konkýrstyq irikteýdiń birinshi kezeńine qatysý úshin úmitkerler Ortalyqqa ssenarıılerdi qaraýǵa ótinimdi, PDF formatynda ssenarıılerdi, avtorlyq shart pen jeke basyn kýálandyratyn qujattardyń kóshirmesi, ótinish berýshi men ssenarıı nemese ssenarıı josparynyń avtory arasyndaǵy aldyn ala shartty jiberýi qajet. О́tinish berýshi fılmniń ár túri, oıyn fılmi, anımasııalyq fılm, derekti-hronıkaly fılmder boıynsha tek 2 ssenarıı usyna alady. Qujattar 5 naýryz ben 13 naýryzǵa deıin (12 naýryz saǵat 23:59) qabyldanady.
«Bizdiń maqsatymyz – ashyq ári ádil konkýrs ótkizý. Aldaǵy ýaqytta irikteýge qatysty aqparattar mınıstrliktiń jáne ortalyqtyń resmı saıtynda jáne áleýmettik jeli akkaýnttarynda turaqty jarııalanatyn bolady. Konkýrstyq irikteýge qatysty saýaldaryńyz bolsa, Kıno ortalyǵy janynan keńes berý qyzmeti ashylǵanyn habarlaımyz! Buǵan deıin osy jylǵy kınojobalar konkýrsyna arnalǵan basym taqyryptar tizimi jarııalanǵan bolatyn. Kınogerler tushymdy dúnıe daıyndap, kórermenge sapaly dúnıe usynýǵa kúsh salady dep senemiz», dedi Mádenıet jáne aqparat mınıstri Aıda Balaeva.Konkýrstyq irikteýge qatysý quqyǵyna ıe bolý úshin úmitkerlerdiń salyq beresheginiń bolmaýy, bankrottyq rásimge tartylmaýy mańyzdy.