Jańaarqa aýdanyndaǵy «Uly Dala Co» JShS qoı etin eksportqa shyǵara bastady. Seriktestiktiń et óńdeıtin kombınatynan jaqynda Qatar eline 2,5 tonna qoı eti eksportqa jiberildi.
Kombınat ashylǵan kezde Qatarmen arada et eksporttaý týraly kelisimshart jasasqan bolatyn. Soǵan oraı ótken jyldyń jeltoqsan aıynda 2 tonna qoı etin eksportqa shyǵaryp, endi mine jyl basynda ekinshi kezektegi ónimin jóneltti. Seriktestik budan bólek, aldaǵy ýaqytta Iordanııaǵa jylyna 500 tonna et jiberýdi josparlap otyr.
Memleket basshysy Qasym-Jomart Toqaev ótken jylǵy halyqqa arnaǵan Joldaýynda agroónerkásip keshenin damytýǵa qatysty mindetterge toqtala kelip: «Aýyl turǵyndaryna óz ónimderin óńdeýge jáne satýǵa múmkindik beretin ınfraqurylym qurý óte mańyzdy» degen edi. «Uly Dala Co» JShS qolǵa alyp jatqan jobalar osy talapqa tolyq saı keletinin baǵamdaýǵa bolady.
Aqtaılaq eldi mekeninde ornalasqan seriktestiktiń et kombınaty ótken jyldyń kúz aıyna qaraı ashyldy. Et ónimderin salqyndatý qoımalary, tońazytý kameralary, zerthanasy, mal soıý sehy jáne konservi sehy sııaqty tehnologııalyq biregeı jelilerdi qamtyǵan jańa kásiporynda qazir 18 adam eńbek etedi. Kombınattyń táýligine 4 tonnaǵa deıin et óńdep, 3 myńǵa jýyq buqtyrylǵan et qalbyryn shyǵaratyn múmkindigi bar. Kásiporynnyń konservi sehynda buqtyrylǵan ettiń úsh túri – qoı, sıyr, jylqy etteri qalbyrlanady.
Aldaǵy ýaqytta etpen úzdiksiz qamtamasyz etetin mal bordaqylaý alańyn iske qosý da oılastyrylǵan. Qarajal qalasynyń syrtyndaǵy Shalǵııa alqabyndaǵy 100 myń gektardaı jaıylymdyq jerinde mal sharýashylyǵyn damytý baǵytyndaǵy jumystar qolǵa alynǵan. Sharýashylyqta 1 500 jylqy, 2,5 myń qoı túligi baǵylyp jatyr.
Amandyq RAHULY
Ulytaý oblysy,
Jańaarqa aýdany