Premer-mınıstr Oljas Bektenov ekonomıkany yryqtandyrý jáne jekeshelendirý máseleleri boıynsha keńes ótkizdi. Prezıdenttiń tıisti Jarlyǵy sheńberinde memlekettiń ekonomıkalyq úderisterge qatysýyn qysqartý jáne básekelestikti arttyrý sharalary júzege asyrylyp jatyr.
Jekeshelendirýdiń 2021–2025 jyldarǵa arnalǵan keshendi josparyn iske asyrý barysy qaralyp, jumystyń tıimdiligin odan ári arttyrý jáne úderisti jetildirý sharalary talqylandy.
Memlekettik múlik tiziliminiń derekterin tekserý ári ózektendirý jumysy aıaqtaldy. Jekeshelendirý úderisin jandandyrý jáne jetildirý sheńberinde kepildik jarnalardy qamtamasyz etý úshin «elektrondy ámııandy» engizý, saýda-sattyqqa qatysýǵa ótinimder berý merzimin ulǵaıtý, sondaı-aq qosymsha resýrstar boıynsha satý týraly habarlamalardy jarııalaýdy qosqanda, nysandardy satý qaǵıdalaryna ózgerister engizildi. Sonymen qatar «Memlekettik múlik týraly» zańǵa tikeleı satýdan bas tartýdy jáne múlikti tek aýksıondar arqyly berýdi kózdeıtin túzetýler ázirlendi. Jer berý tetiginiń ashyqtyǵyn qamtamasyz etý úshin shóldi jáne shóleıt aımaqtardy qospaǵanda, aýyl sharýashylyǵy maqsatyndaǵy jerlerdiń 100%-y sıfrlandyryldy.
Búginde ákimshilik zańnamaǵa bıznesti negizsiz aralasýdan qorǵaýǵa baǵyttalǵan túzetýler engizildi.
Qarjy mınıstrliginiń derekterine sáıkes, qazirgi ýaqytta jalpy quny 918,3 mlrd teńgeni quraıtyn 392 memlekettik menshik jáne kvazımemlekettik sektor nysany básekelestik ortaǵa berildi, 69 nysan qaıta uıymdastyrýǵa/taratýǵa jiberildi. Sonymen qatar 21 nysan saýdaǵa shyǵarylyp, 155 nysan satylymǵa deıingi daıyndyqta.
Keńes qorytyndysy boıynsha Premer-mınıstr ekonomıkany yryqtandyrý, onyń ishinde qamtylatyn salalardy keńeıtý jumystaryn jandandyrýdy tapsyrdy.