Jambyl oblysynyń dıqandary kóktemgi dala jumystaryna saqadaı-saı. Oblystyq aýyl sharýashylyǵy basqarmasy ókilderiniń aıtýynsha, bıyl 54,8 myń tonna tuqym daıyndalǵan, dep habarlaıdy Egemen.kz.
Jalpy alǵanda bıyl 659,9 myń gektar alqapqa aýyl sharýashylyǵy daqyldaryn ornalastyrý josparlanǵan. Bul kórsetkish ótken jylmen salystyrǵanda 33,2 myń gektarǵa artqan. Sondaı-aq kóktemgi dala jumystaryn qarjylandyrý úshin «Agronesıelik korporasııa» arqyly sharýalarǵa 8 mlrd teńge kóleminde 5 paıyzben nesıe berilmek.
«Osy jyly 400-den astam aýyl sharýashylyǵy tehnıkasyn satyp alyp, jańarý josparyn 6,5 paıyzǵa jetkizý kózdelip otyr. 2025 jyly aýyl sharýashylyǵy salasyn qoldaýǵa 39,6 mlrd teńge bólindi. Bul qarjy esebinen 16 myńnan asa aýyl sharýashylyǵy taýar óndirýshisine qoldaý kórsetiledi. Nátıjesinde ósimdik sharýashylyǵynda 325,1 mlrd. teńgeniń ónimi óndiriledi dep kútilýde», deıdi oblystyq aýyl sharýashylyǵy basqarmasy basshysynyń mindetin atqarýshy Ábdirásil Jeleýbaev.
О́ńir sharýalarynyń alańsyz jumys isteýi úshin barlyq jaǵdaı qarastyrylyp jatyr. Úkimet tarapynan 20 myń tonna dızel otyny bólingen. Sondaı-aq osy jyly birshama alqapqa 83,1 myń tonna mıneraldy tyńaıtqysh engizý josparlanǵan. Al sharýalarǵa arzandatylǵan baǵamen usynylatyn janar-jaǵarmaıdyń kedergisiz berilýin óńir basshysy Erbol Qarashókeev jeke baqylaýyna aldy.