Ortalyq kommýnıkasııalar qyzmetiniń alańynda ótken baspasóz konferensııasynda QR Oqý-aǵartý vıse-mınıstri Edil Ospan balalardyń sıfrlyq qaýipsizdigi máselelerine toqtaldy, dep habarlaıdy Egemen.kz.
2023-2025 jyldarǵa arnalǵan Balalardy zorlyq-zombylyqtan qorǵaý, sýısıdtiń aldyn alý jáne olardyń quqyqtary men salamattylyǵyn qamtamasyz etý jónindegi keshendi jospardy júzege asyrý aıasynda Oqý-aǵartý mınıstrligi balalardyń sıfrlyq qaýipsizdigin arttyrý maqsatynda arnaıy SIM-karta engizý bastamasyn kótergen.Bul – balalardyń mobıldi qurylǵylardy qaýipsiz paıdalanýyn qamtamasyz etýge jáne ata-analar tarapynan baqylaýdy kúsheıtýge baǵyttalǵan arnaıy tarıftik jospar. Balalarǵa arnalǵan SIM-kartalardyń basty artyqshylyqtary ata-ana baqylaýy, zııandy jáne qalaýsyz kontentten qorǵaý jáne balanyń ornalasqan jerin baqylaý.
«Halyqaralyq tájirıbe kórsetkendeı, balalarǵa arnalǵan SIM-kartalar baılanys operatorlary tarapynan qoldaý taýyp, sıfrlyq qaýipsizdik salasyndaǵy memlekettik bastamalarmen qatar júredi. Bul ata-analarǵa balalardyń telefondy qoldanýyn tıimdi baqylaýǵa múmkindik beredi. Qazaqstanda baılanys operatorlary balalarǵa arnalǵan, bilim berý resýrstaryna shekteýli qoljetimdilik beretin tarıfterdi usynǵanymen, ınternettegi qaýipsiz minez-qulyqty tolyq baqylaý múmkindigin qamtamasyz etpeıdi. Mınıstrliktiń bul bastamasy balalardyń ınternettegi qaýipsizdigin kúsheıtip, ata-analarǵa olardyń onlaın keńistiktegi qorǵanysyn qamtamasyz etýde joǵary deńgeıdegi qoldaý kórsetedi», dep málimdedi Edil Ospan.Esterińizge sala keteıik, elimizde «Balalardy olardyń densaýlyǵy men damýyna zııan keltiretin aqparattan qorǵaý týraly» zańǵa ózgerister men tolyqtyrýlar engizý boıynsha jumys bastalǵan edi. Bul sharalar balalardyń ınternettegi qaýipsizdigin zańnamalyq turǵydan kúsheıtýge baǵyttalǵan.