Qalada 19 naýryz, Jańarý kúnine oraı aýqymdy kógaldandyrý jumystary júrgizilip jatyr. «Jibek joly» saıabaǵynda ótken aǵash egý sharasyna qala ákimi Ázimbek Pazylbekuly, memlekettik mekeme qyzmetkerleri, qoǵam qaıratkerleri, BAQ ókilderi men qala turǵyndary belsene qatysty, dep habarlaıdy Egemen.kz.
Túrkistan qalasy ákimdigi men oblystyq tabıǵı resýrstar jáne tabıǵat paıdalanýdy retteý basqarmasy uıymdastyrǵan aksııa aıasynda 1000-nan astam adam qatysyp, saıabaq aýmaǵyna aǵash kóshetterin otyrǵyzǵan.
Sonymen qatar, «Qylýet» meshiti, Shekti Tileý kóshesi, Tóle bı saıabaǵy syndy qalanyń ózge de aımaqtarynda aǵash, buta jáne gúl kóshetteri egilip jatyr.
Aıta keteıik, kóktemgi maýsymda qala boıynsha 10 myńnan astam aǵash otyrǵyzý josparlanǵan.
Bıyl Túrkistanda kóktem jáne kúz mezgilderinde barlyǵy 197 010 aǵash pen 365 144 buta jáne gúl kóshetterin otyrǵyzý kózdelgen. Kóktemgi kezeńde oblys ákimdigi men tabıǵı resýrstar basqarmasynyń qoldaýymen 111 260 aǵash, 92 661 buta jáne kópjyldyq gúlder otyrǵyzylsa, qala bıýdjeti esebinen 85 750 aǵash, 272 483 buta men gúl kóshetteri egiledi.
Naýryz meıramyna oraı oblys aýmaǵynda kógaldandyrý jumystary qarqyndy júrgizilip jatyr. Otyrǵyzylyp jatqan kóshetter qatarynda Túrkistan klımatyna beıimdelgen terek, qaraǵash, aılant, qaraǵaı, úıeńki, arsha, sırııalyq raýshan, shaǵan jáne jemis aǵashtary bar.
Bul bastama Túrkistannyń ekologııalyq jaǵdaıyn jaqsartyp, jasyl jelekke oranǵan kórikti qalaǵa aınalýyna úlken úles qospaq.