Senat tóraǵasy Máýlen Áshimbaev Batys Qazaqstan oblysynda eńbek ujymdarymen, máslıhat depýtattarymen, Qazaqstan halqy Assambleıasynyń múshelerimen, jergilikti jurtshylyqpen jáne jastarmen kezdesýler ótkizdi. Sapar barysynda Ulttyq quryltaıdyń IV otyrysynda Memleket basshysy júktegen mindetterdi iske asyrý, Senattyń óńirlerdi damytýǵa yqpalyn odan ári kúsheıtý máseleleri, sondaı-aq palatanyń máslıhattarmen birlesken jumysynyń mańyzdy baǵyttary talqylandy.
Máslıhat depýtattarymen jáne oblys jurtshylyǵymen kezdesýde saıası, ekonomıkalyq jáne áleýmettik reformalardy iske asyrý barysyna basa mán berildi. Máýlen Áshimbaev ádiletti, qaýipsiz jáne qýatty Qazaqstan qurý úshin Prezıdent Ulttyq quryltaıdyń IV otyrysynda belgilep bergen basymdyqtardy sapaly iske asyrýdyń mańyzdy ekenin atap ótti.
Sondaı-aq palata spıkeri barlyq deńgeıdegi keshendi jumys, múddeli taraptardyń belsendiligi, syndarly ózara is-qımyl, sonyń ishinde qajetti zańdardy ýaqtyly qabyldaý, eń aldymen, elimizdiń tabysty ekonomıkalyq damýynyń, óńirlerdiń órkendeýiniń jáne azamattardyń ál-aýqatynyń artýynyń kepili ekenin aıtty.
«Prezıdent Qasym-Jomart Toqaev Ulttyq quryltaıdyń IV otyrysynda elimizdi damytýǵa qatysty ózekti máselelerge keńinen toqtaldy. О́ńirlerdiń ekonomıkasyn órkendetý negizgi baǵyttardyń biri retinde belgilendi. Quryltaıda ishki saıasat, ıdeologııa, bilim berý máselelerine de erekshe nazar aýdaryldy. Aıtylǵan barlyq bastama ádiletti, qaýipsiz, taza jáne qýatty Qazaqstan qurý ıdeıasyn iske asyrýǵa arnalǵan. Osy jáne basqa da mindetterdi sapaly iske asyrý úshin júıeli ári tıimdi jumys isteýimiz kerek», dep Senat tóraǵasy oblystyq máslıhat depýtattaryn ortaq maqsattarǵa qol jetkizý úshin palatanyń zań shyǵarý qyzmetine belsendi qatysýǵa shaqyrdy.
Osyǵan baılanysty M.Áshimbaev sáýir aıynda Máslıhattarmen ózara is-qımyl jónindegi keńestiń jańa formattaǵy keńeıtilgen otyrysyn ótkizý josparlanyp otyrǵanyn tilge tıek etti. Onda Memleket basshysy Máslıhat depýtattarynyń II respýblıkalyq forýmynda belgilep bergen mindetter talqylanbaq.
Sonymen qatar M.Áshimbaev ekonomıkany ártaraptandyrýdyń, óńdeýshi ónerkásip pen aýyl sharýashylyǵyn damytýdyń mańyzdy baǵyttaryna toqtaldy. Kezdesýde el Prezıdentiniń óńirlerge qatysty ınvestısııalar tartý, jańa tehnologııalar engizý, jańa kásiporyndardy iske qosý jáne jumys oryndaryn ashý jónindegi ózekti bastamalary da talqylandy.
Is-sharada atap ótilgendeı, qazirgi tańda Batys Qazaqstan oblysy – ekonomıkanyń ósý qarqyny boıynsha aıtarlyqtaı deńgeıde. Sondaı-aq byltyr sý tasqynynyń saldaryn joıý jáne bıyl onyń aldyn alý baǵytyndaǵy jumystarda da joǵary nátıjelerge qol jetkizilgeni sóz boldy.
«Búginde Batys Qazaqstan oblysy elimizde ónerkásip óndirisi, aýyl sharýashylyǵy, shaǵyn jáne orta bıznes sııaqty mańyzdy salalardyń damýyna úlken úles qosyp otyr. Túrli baǵdarlamalar tabysty iske asyrylyp, óńirdiń ekonomıkasy turaqty ósip keledi. Bıyl 841 mlrd teńge ınvestısııa tartylyp, aýyl sharýashylyǵy, qaıta óńdeý, ónerkásip, týrızm jáne taǵy basqa salalar boıynsha iri jobalardy iske asyrý kózdelip otyr. Byltyrǵy sý tasqynynyń saldaryn joıýǵa jáne zardap shekkenderge kómek kórsetýge qatysty Prezıdent júktegen mindetter jedel oryndalǵanyn da atap ótken jón. Bıyl da sý tasqynynyń aldyn alý jumystary júıeli túrde júrgizilip keledi. Senat óńirlerdiń múddesin qorǵaıtyn palata retinde oblystardyń damýyna qoldaý kórsetý baǵytyndaǵy jumysty jalǵastyra beredi», dedi M.Áshimbaev.
Sonymen qatar senatorlar Mahambet О́temisuly atyndaǵy Batys Qazaqstan ýnıversıtetinde óńirdiń belsendi jastarymen kezdesti. Onda qolǵa alynǵan reformalardy iske asyrý jáne el damýyndaǵy jastardyń róli jan-jaqty talqylandy. Senat tóraǵasy atap ótkendeı, zııatker, bilimdi, jasampaz, zaman talaptaryna jedel beıimdeletin jastar – elimizdi jańǵyrtýdyń qozǵaýshy kúshi. Sondyqtan qazir jas býynǵa júıeli qoldaý kórsetý úshin keshendi reformalar júzege asyrylyp, strategııalyq baǵdarlamalar men memlekettik jobalar qolǵa alynyp jatyr. Sonyń ishinde jańa formasııadaǵy mamandar daıarlaýdy kózdeıtin bastamalardyń máni zor.
«Memleket basshysynyń bastamasymen elimizde aýqymdy saıası, ekonomıkalyq jáne áleýmettik reformalar júrgizilip jatyr. «Ulttyq qor – balalarǵa» baǵdarlamasy iske qosyldy. «Keleshek» jınaqtaýshy júıesi týraly zań qabyldandy. «Bolashaq» baǵdarlamasy aıasynda shetelde oqý jáne taǵylymdamadan ótý múmkindikteri keńeıtildi. Osylaısha, óskeleń urpaqtyń áleýmettik kepildikterin qamtamasyz etýge, sapaly bilim alýyna jáne jeke tulǵa retinde damýyna qajetti jaǵdaı jasalyp otyr. Sondyqtan jastar da óz tarapynan el aldyndaǵy jaýapkershilikti sezinip, Memleket basshysy belgilep bergen Ádiletti Qazaqstan qalyptastyrý jolyndaǵy mindetterdi iske asyrý úshin bar kúsh-jigerin jumsaýǵa tıis», dedi palata spıkeri.
Sonymen qatar senatorlar byltyrǵy sý tasqynynan zardap shekken turǵyndarǵa arnalyp Memleket basshysynyń tapsyrmasymen salynǵan úılerge arnaıy bardy. Sondaı-aq jaqynda iske qosylǵan 150 oryndyq «Aqjaıyq» múgedektigi bar adamdardy ońaltý ortalyǵynyń qyzmetimen tanysty. Munda erekshe qajettilikteri bar azamattar úshin robotty keshender qoldanylatyn emdik dene shynyqtyrý kabıneti jumys isteıdi. Odan bólek, ortalyqta bochcha parasporttary boıynsha jattyǵý zaly, ońaltýǵa arnalǵan arnaıy kabınetter qarastyrylǵan basseın jáne oqý ǵımaraty bar.
Depýtattar sýsymaly júkterge arnalǵan bıgbegter men vagon tósemderin shyǵaratyn «Packaging Systems» JShS men «Kvant» jıhaz fabrıkasynyń óndiris tehnologııasymen tanysty. Eńbek ujymdarymen kezdesýler barysynda óńir turǵyndaryn tolǵandyratyn ózekti máseleler men óndiristerdi odan ári keńeıtý jáne ınvestısııalar tartý tetikteri talqylandy.