2003 jylǵy zilzala qulandyqtardyń jadynan óshpese kerek. 28 naýryz kúni tún jarymynda bolǵan jer silkinisi Merki, Turar Rysqulov, Qordaı, Moıynqum aýdandary men Taraz, Shý qalasy aýmaǵyna deıin jetse de, merkilikter men qulandyqtar kádimgideı daýryǵyp ketti. Sebebi jer dúmpýiniń joǵary qarqyny atalǵan eki aýdanda tirkelip, halyqty qatty ábigerge túsirdi.
О́ńirdegi jer silkinisi bılik nazarynan tys qalǵan joq. Memleket basshysy Qasym-Jomart Toqaev Jambyl oblysynyń ákimi Erbol Qarashókeev pen Tótenshe jaǵdaılar mınıstri Shyńǵys Árinovtiń baıandamasyn tyńdap, Úkimet basshysy Oljas Bektenovke áleýmettik nysandar men búlingen turǵyn úılerdi qalpyna keltirý boıynsha jedel iske kirisýdi tapsyrdy.
Qazirgi kezde óńirdegi ahýaldy Premer-mınıstr jeke baqylaýyna alǵan. Úkimet basshysynyń tapsyrmasyna sáıkes óńirde bolǵan jer silkinisine baılanysty jergilikti atqarýshy bılik ókilderi jaǵdaıdy zerdeleý, jedel sharalar qabyldaý jumysyn úılestirip jatyr. Tótenshe jaǵdaılar vıse-mınıstri bastaǵan úkimettik jumys toby óńirge kelip, jaǵdaımen tanysty.
28 naýryz kúni bolǵan jer dúmpýi sol kúni tús áletinde bir qaıtalandy demesek, odan keıin qaýip tónetindeı jaǵdaı týyndaǵan joq. О́ńir basshysy Erbol Qarashókeev bastaǵan jergilikti bılik ókilderi tań bozynan Merki, Turar Rysqulov aýdandaryna at basyn buryp, búlingen áleýmettik nysandar men turǵyn úılerdi aralap shyqty. Keıinnen Tótenshe jaǵdaılar vıse-mınıstri Kegen Tursynbaev bastaǵan úkimettik komıssııa músheleri de Turar Rysqulov aýdanynda bolyp, zardap shekken turǵyn úıler men áleýmettik nysandarǵa arnaıy at basyn burdy.
Komıssııa músheleri men oblys basshysy Erbol Qarashókeev aldymen Turar Rysqulov aýdany aýmaǵyndaǵy Jańaturmys aýylyna bardy. Eldi mekendegi birneshe úıdiń qabyrǵasynda jaryqshaq paıda bolǵanyn kórgen óńir basshysy baspanasy búlingen azamattarǵa ataýly áleýmettik kómek kórsetiletinin jetkizdi.
Resmı derekke sensek, aýyldaǵy bilim oshaǵynyń qabyrǵasynda jaryqtar paıda bolǵany anyqtalǵan. E.Qarashókeev bilim alýshylarǵa qolaısyzdyq týmaýy úshin jaýaptylarǵa qalpyna keltirý jumysyn jedel júrgizý kerektigin shegelep tapsyrdy.
Qazir Memleket basshysynyń tapsyrmasyna sáıkes keltirilgen shyǵyndy baǵalaý, búlingen múlikti qalpyna keltirýge qatysty naqty jumystar júrgizilip jatyr. Quramynda oblys ákimdiginiń, seısmologııalyq baqylaý jáne zertteýler ulttyq ǵylymı ortalyǵynyń, tıisti vedomstvolardyń ókilderi bar jumys toby jaǵdaıdy tolyqtaı baqylaýǵa alǵan.
Komıssııa músheleri Merki, Turar Rysqulov aýdanyna qarasty birneshe eldi mekendegi ǵımarattar men turǵyn úılerdi aralap, tehnıkalyq tekserý jumysyn júrgizdi. Resmı derekke sensek, eki aýdanda jalpy sany 17 áleýmettik nysan búlingen. Onyń 11-i – bilim berý, ekeýi densaýlyq saqtaý, ekeýi áleýmettik qorǵaý, bireýi sport, taǵy bireýi mádenıet salasyna qarasty mekemeler. Aýyldyq okrýg ákimderine qazirgi ýaqytqa deıin baspananyń búlingeni týraly 104 aryz-shaǵym túsken. Komıssııa músheleri turǵyn úılerdi tekserý jumysyn jalǵastyryp jatyr. Shyǵyn kólemi aldaǵy kúnderi anyqtalady.
Tań shapaǵy kóringenshe mazasy qashqan jurt jergilikti atqarýshy bılik ókilderiniń judyryqtaı jumylǵanyn, barlyq qaýipsizdik sharalaryn qabyldaǵanyn, halyqpen tikeleı baılanys ornatqanyn kórgen soń eńse tiktedi.
«Memleket basshysy óńirdegi jaǵdaıdy jeke baqylaýyna aldy. Prezıdent áleýmettik nysandar men turǵyn úılerdi qalpyna keltirý, jóndeý jumystaryn júrgizýge qajetti kómek kórsetýdi júktedi. Úkimet basshysynyń tapsyrmasymen úkimettik jumys toby da jedel iske kiristi. О́ńir turǵyndarynyń qaýipsizdigin qamtamasyz etý boıynsha tıisti jumys atqaryldy. Halyqtyń qaýipsizdigi ilki sátke de nazardan tys qalmaıdy», deıdi óńir basshysy E. Qarashókeev.
Qalaı desek te jer dúmpýi Merki, Turar Rysqulov aýdany turǵyndarynyń qutyn qashyrǵany anyq. Abyroı bolǵanda, jergilikti atqarýshy bılik ókilderi der kezinde judyryqtaı jumylyp, barlyq qaýipsizdik sharasyn qabyldady. Jer silkinisi saldarynan keltirilgen shyǵyn tolyq eseptelip jatyr. Aldaǵy ýaqytta áleýmettik nysandar men turǵyn úılerdiń búlingen qabyrǵalaryn qalpyna keltirý jumysyn jedel aıaqtaý mindeti tur.
Jambyl oblysy