Oral qalasynda voleıboldan Qazaqstan Respýblıkasy chempıonatynyń XXXIII maýsymy aıasynda erler arasyndaǵy Ulttyq lıganyń fınaldyq kezeńi aıaqtaldy, dep jazady Egemen.kz.
Fınalda batysqazaqstandyq «Jaıyq» komandasy Aqtóbe komandasymen kezdesip, tartysty oıynda 3:1 esebimen jeńiske jetti. Júldeli úshinshi oryn – «Atyraý» voleıbol komandasynda.
Oral qalasyndaǵy sý jańa «Jaıyq arena» sport kesheninde ótken saıys jankúıerler arasynda da erekshe qyzyǵýshylyq týǵyzdy. Jarysty uıymdastyrýshylardyń pikirinshe, óńirde sporttyń osy túriniń bolashaǵy óte zor.
«Osy týrnırdan keıin Oralda voleıbolǵa degen halyqtyń yqylasy, qyzyǵýshylyǵy óte joǵary deńgeıde bolady dep oılaımyn. Estip jatyrmyn, myna jerdegi voleıbol seksııasyna 120 qyz jazylypty. Erler arasynda da, qyzdar arasynda da Oral komandasy Qazaqstan chempıonatynyń birneshe márte jeńimpazy, júldegeri boldy. Bul dástúrge aınalǵan deýge bolady. Jalpy Qazaqstannyń túkpir-túkpirinde voleıbol jaqsy damyp kele jatyr», deıdi Qazaqstan voleıbol federasııasynyń vıse-prezıdenti, pleı-off oıyndarynyń bas tóreshisi Ermek Syrlybaev.
Batys Qazaqstan oblystyq dene shynyqtyrý jáne sport basqarmasy «Jaıyq» komandasynyń bul jetistigin tarıhı jeńis dep baǵalap jatyr. Buǵan deıin «Jaıyq-Kondensat» komandasy 1998 jyly el chempıony atanǵan eken. Araǵa 27 jyl salyp, «Jaıyq» óz tarıhyndaǵy chempıondyq ataǵyn qaıta jańǵyrtqan.