«Taza Qazaqstan» respýblıkalyq ekologııalyq aksııasyna Aqtóbe oblysynyń eńbek ujymdary, bilim berý mekemeleriniń oqytýshylary men stýdentteri, tipti tazalyqty súıetin qarapaıym turǵyndar da úles qosyp keledi.
Eki aıǵa sozylatyn ıgilikti isten ardagerler de qalys qalmady. Olar qalalyq ardagerler keńesiniń uıymdastyrýymen Eset batyr turǵyn úı alabyndaǵy Eset Kókiuly eskertkishi janyna birneshe túp shyrsha otyrǵyzdy. Jas kóshetter Mártók aýdanyndaǵy tálimbaqtan ákelindi. Almaty aýdany ákimi Rústem О́teshovtyń habarlaýynsha, jergilikti jerde ósirilgen aǵsh kóshetteri tez jersinedi ári qurǵaq klımatqa óte tózimdi. Aldaǵy ýaqytta da skverler men saıabaqtarǵa, qoǵamdyq oryndardaǵy bos alańqaılarǵa Mártók tálimbaǵynan úıeńki, qaıyń, dolana, qaraǵaı, shyrsha kóshetteri men butalar ákelip otyrǵyzylady.
Munymen bir kezde Aqtóbe qalasyndaǵy Keńes Odaǵynyń Batyry Álııa Moldaǵulova atyndaǵy alleıaǵa 60 shaqty stýdent, mektep oqýshylary men NEET sanatyndaǵy jastar jınalyp, tazalyq jumystaryn júrgizdi, memorıaldy keshen tóńiregin jýyp, qoqys jınady. «Jasyl el» eńbek otrıadtary oblystyq shtabynyń jáne «Atamken» stýdentter otrıadynyń jetekshisi Nurjan Shańǵytbaevtyń aıtýynsha, ár apta saıyn senbilikke qatysýǵa nıetti jastar qatary tolyǵyp jatyr. Olar Batyrlar alleıasynan aǵaıyndy Jubanovtar kóshesi men Áilqaıyr dańǵylyna deıingi aralyqty bir mezette jınap shyqty jáne gúlzarlar ornyn qopsytyp, tal egetin uıashyqtar qazdy. «Jasyl el» otrıadynyń jigitteri men qyzdary jaz boıy ekologııalyq aksııany jalǵastyryp, Elek, Qarǵaly, Sazdy ózenderiniń jaǵalaýlary men Aqtóbe sý qoımasynyń aınalasyn tazalamaqshy.
Aqtóbe oblysy.