Jympıty selosynda aqyn Abdolla Jumaǵalıevtiń 115 jyldyǵyna oraılastyrylǵan keshendi is-sharalardyń kerýeni bastaldy. Aqyn dúnıege kelgen kúni Batys Qazaqstan oblysynyń túkpir-túkpirinen kelgen oqýshylar onyń óleńderin jatqa aıtty.
Qasym Amanjolovtyń sózimen aıtsaq, «Jaý jolyna atam seni, Bomba bol da jaryl, júrek!» dep óshpes erlik kórsetken qaharman jerlesin jympıtylyqtar umytqan emes. Aqyn ósken aýyldaǵy mektep Abdolla Jumaǵalıevtiń esimin ıelengen. 2015 jyly Syrym aýdany ákimdiginiń qoldaýymen aqyn shyǵarmalarynyń tolyq jınaǵy baspa betin kórdi. Dálirek aıtsaq, 1985 jyly Ábý Sársenbaev qurastyrǵan jınaq tolyqtyrylyp, qaıta basyldy. Sonymen birge aýdandyq «Abdolla oqýlary» bıyl oblystyq deńgeıge kóterilip, Aqjaıyq óńirine túgel nasıhattaldy.
– Búgin Jeńistiń 80 jyldyǵy qarsańynda qaharman qalamger Abdolla Jumaǵalıevke arnalǵan mádenı is-sharalar resmı túrde bastaldy. Osy is-sharanyń alǵashqy qarlyǵashtary – aqyn jyryn jattaǵan balalar! – dedi oblystyq Abdolla oqýlaryn saltanatty ashyp bergen Syrym aýdany ákiminiń orynbasary Serik Toqmambetov. Serik Ánýarulynyń aıtýynsha, abdollataný boıynsha Syrym aýdanynda jyl boıyna birneshe is-shara ótkizedi.
«Bolar meniń murama oralar kún!» atty oqýshylar arasyndaǵy Abdolla oqýlary Syrym Datuly atyndaǵy tarıhı-ólketaný mýzeıinde, tarıhı jádigerler arasynda ótti. Munyń ózi baıqaýǵa erekshe sıpat bergendeı. Aqyn oqýlaryna Syrym aýdanynan bólek Terekti, Tasqala, Qaratóbe, Bórli, Báıterek aýdandarynan jáne Oral qalasynan oqýshylar qatysty. «Is-sharanyń oblystyq deńgeıge kóterilýi abdollataný jumysynyń jańa deńgeıge shyqqanyn kórsetedi», deıdi osy jıynnyń bastamashylarynyń biri, mýzeı dırektory Aınagúl Oıshybaeva.
Sonymen, tartysty ótken saıysta birinshi oryndy syrymdyq óren, Jahansha Dosmuhameduly atyndaǵy mektep-balabaqsha-bóbekjaı kesheniniń oqýshysy Aısana Murat jeńip aldy. Oǵan aqynnyń 110 jyldyǵy qurmetine 110 myń teńge syıaqy berildi. Ekinshi orynǵa qaratóbelik Marat Kenesary, úshinshi orynǵa Maqsat Qazımjan ıe boldy. Ekinshi orynnyń júldesi – 80 myń bolsa, úshinshi oryn úshin syılyq – 50 myń teńge. Qalǵan qatysýshylar da qur qalmady. Ár balaǵa dıplom men qarjylaı syılyq berildi.
Bul kúni kópshilikti qýantqan taǵy bir jańalyq – aqyn Abdolla Jumaǵalıev, jýrnalıst Qajym Kóshekov jáne jazýshy Járdem Tilekov týraly derekter, maqalalar toptastyrylǵan «Syrymnan ushqan úsh qyran» atty jınaqtyń tusaýy kesildi. Bul úsheýiniń de taǵdyry uqsas. Úsheýi de – Syrym aýdanynda dúnıege kelgen, úsheýi de qalamger, úsheýi de – maıdanger. Abdolla men Qajym sol qyrǵynda erlikpen qaza tapsa, Járdem soǵystan aman kelip, qazaq ádebıetine ólgenshe qyzmet etti. «Syrym batyr» dastanyn jazdy. Jeńis qarsańynda jaryq kórgen kitapty «Syrym eli» qoǵamdyq-saıası gazetiniń redaktory Baýyrjan Shırmedınuly qurastyryp, aýdan ákimdiginiń qoldaýymen basylǵan.
Aıta keteıik, kitaptyń baýyn kesý qurmeti aqynnyń baýyry Shaıdolla Jumaǵalıevtiń jary Rashıda Hasenovamen birge osy joldardyń avtoryna da buıyrdy. Abdolla aqynnyń ózi maıdanǵa attanarda:
«Múmkin keri qaıtpaspyn, joǵalarmyn,
Kózim jumyp, qum kórpe oranarmyn.
О́lmen biraq, bir kezde syrshyl ulan
Bolar meniń murama oralar kún»,
degen eken. Shynymen de aqynnyń sózi týǵan jer aspanynda sańqyldap qaıta estildi.
Bul kúni aýdandyq mádenıet úıinde Muqades Eslamǵalıev atyndaǵy ortalyqtandyrylǵan kitaphanalar júıesi «Daryndy aqyn, dańqty jaýynger» atty kitap kórmesin uıymdastyrsa, sahnada «Qaharman qalamger» atty ádebı-sazdy kesh ótti.
Batys Qazaqstan oblysy,
Syrym aýdany,
Jympıty aýyly