2025 jylǵy 9 sáýirde Májilistiń jalpy otyrysynda qarjy naryǵyn damytý jáne qarjylyq qyzmetterdi tutynýshylardyń quqyqtaryn qorǵaý máseleleri boıynsha zań jobasy ekinshi oqylymda qabyldandy, dep habarlaıdy Egemen.kz.
Jańa zań aıasynda 21 jasqa tolmaǵan jáne 55 jastan asqan azamattar kepilsiz tutynýshylyq nesıe alý úshin «elektrondyq úkimet» portaly arqyly resimdelgen kelisim berýi qajet bolady. Bul talap qosymsha quqyqtyq aktilerde naqty kórsetiledi.
Kepilsiz onlaın tutynýshylyq nesıelerdi rásimdegen kezde, 24 saǵattyq «salqyndaý» kezeńi engiziledi. Bul ýaqyt ishinde azamat nesıe sharttarymen muqııat tanysyp, sheshimin ózgerte alady.
Eger azamat alǵash ret nesıe alatyn bolsa, ol mindetti túrde bank nemese mıkroqarjy uıymynyń bólimshesine kelip, jeke qatysý arqyly rásimdeýi qajet.
Al áskerı qyzmet ótip jatqan áskerı qyzmetshilerge kez kelgen nesıeler men mıkrokredıtter berýge zań júzinde tyıym salynady.
Zań aıasynda alaıaqtyq árekettermen alynǵan nesıeler men mıkrokredıtterdi esepten shyǵarý múmkindikteri keńeıtiledi. Bankter tranzaksııalardaǵy kúmándi belgilerdi anyqtaýǵa qatysty qosymsha ókilettikterge ıe bolady.
Mıkrokredıtter boıynsha aıyppul men ósimpul alýǵa tolyqtaı tyıym salynady (qaıtarylmaǵan jaǵdaıdan basqa). Sonymen qatar, áleýmettik osal toptarǵa ekonomıkalyq jaǵdaı nasharlaǵan kezde mindetti túrde keminde 3 aı merzimge aıyppulsyz nesıe tóleýdi shegerý qarastyrylǵan.
Qıyn jaǵdaıǵa tap bolǵan azamattar úshin aı saıynǵy tólem somasy 50% jáne odan kóp mólsherge azaıtylýy múmkin. Banktik nesıeni ishinara nemese merziminen buryn ótegeni úshin jeke tulǵalardan aıyppul óndirilmeıdi.