Astana qalasynda «Ortalyq Azııa medıakeńistigi: ósý men yntymaqtastyqtyń jańa tustary» taqyrybymen ótip jatqan I Ortalyq Azııa medıaforýmynda mádenıet jáne aqparat mınıstri Aıda Balaeva elimizdiń medıa salasyn jetildirýde júrgizilip jatqan jumystardyń úderisi men nátıjesi týraly baıandap berdi, dep habarlaıdy Egemen.kz.
«Elimizdiń aqparat salasyndaǵy zańnamalyq bastamalardy tabysty iske asyrýy mańyzdy jetistikterdiń biri dep bilemiz. Jańa tehnologııalardyń qarqyndy damýyn nazarǵa ala otyryp, zańnamany jańa aǵymdar men úrdisterdiń barlyǵy eskeriletindeı etip jetildirý qajettiligi týyndady. Osylaısha 2023 jyly Memleket basshysy «Onlaın-platformalar jáne onlaın-jarnama týraly» Zańǵa qol qoıdy. Onda «onlaın-platforma» jáne «jedel habar almasý servısi» uǵymdary aıqyndaldy, sheteldik onlaın-platformalardyń BAQ salasyndaǵy ýákiletti organmen yqpaldastyq boıynsha óziniń zańdy ókilin taǵaıyndaý, zańdarmen jáne sot sheshimderimen tyıym salynǵan zańsyz aqparatty joıý sharalary belgilendi. Sondaı-aq mádenıet jáne aqparat mınıstrliginiń sheteldik onlaın-platformalardyń, messendjerlerdiń zańdy ókilderiniń tizilimin júrgizý quzyreti engizildi», dedi mınıstr.
Budan keıin A. Balaeva ýákiletti organnyń memlekettik jáne memlekettik emes BAQ-qa granttar berýdi, memlekettik tildegi kontent úlesin kezeń-kezeńimen ulǵaıtýdy, qoǵamnyń adamgershilik damýyna zııan keltirý jáne jalpyadamzattyq, ulttyq, mádenı jáne otbasylyq qundylyqtardy buzý turǵysynan buqaralyq aqparat quraldarynyń ónimderine monıtorıng júrgizý jónindegi quzyretin engizýdi kózdegen «Mass-medıa týraly» Zańnyń sátti qabyldanyp, kúshine engenin atap ótti.
Mınıstrdiń aıtýynsha. elimiz zańsyz kontent (kıberbýllıng, alaıaqtyq, ekstremızm, pornografııa) pen jalǵan aqparatty taratýǵa qarsy kúreste aıtarlyqtaı jaqsy nátıjege qol jetkizgen.
«Máselen, 2018 jyly zııandy kontentke qol jetkizýdi shekteýdiń quqyqtyq tetikterin bekitken «Balalardy densaýlyǵy men damýyna zııan keltiretin aqparattan qorǵaý týraly» Zań qabyldandy jáne jetildirilýde. Sol tetikter aqparattyq keńistiktegi balalardyń qaýipsizdiginiń negizderin qamtamasyz etýde mańyzdy qadam boldy.Qabyldanǵan sharalardyń arqasynda «balalardyń aqparattyq qaýipsizdigi», «balalardy densaýlyǵy men damýyna zııan keltiretin aqparattan qorǵaý», «balalardyń aqparatqa qol jetkizýi» sııaqty anyqtamalar paıda boldy, balalar úshin tyıym salynǵan kontenttiń tizbesi bekitildi, aqparattyq ónimderge jas shekteýleri belgilendi», dedi mınıstr.