Almatydaǵy «Sádý Arenada» «Nomad Wrestling 2» týrnıri ótti. Atalǵan jarystyń basty ereksheligi – kúrestiń san alýan túrin serik etken sportshylar bozkilemge shyǵyp, elimizdiń eń myqty balýanyn anyqtaıdy. Bul jerde salmaq dárejesine qaraı bóliný bolmaıdy. Árkimniń aıqasý stıli de ártúrli. Biraq ereje bárine ortaq. Osy oraıda, uıymdastyrýshylar «Kúsh atasyn tanymaıdy» degen qaǵıdany ustanyp otyr.
Jarys jolyna shyqqandar arasynan kóptegen beldi balýandy tanydyq. Máselen, baq synaýshylar qatarynda qazaq kúresinen «Qazaqstan Barysy» jobasynda júldegeler qatarynan kórinip, kórermenderdiń kózaıymyna aınalǵan Rýslan Ábdirazaqov pen Saıat Shámshıevti, erkin jáne grek-rım kúresinen elimizdiń ulttyq komandasynyń músheleri, Azııa oıyndary men qurlyq chempıonatynda atoı salǵan Ádilet Daýlynbaev, Nurǵalı Nurǵaıypuly, Azat Sydyqovty, dzıýdodan jastar arasyndaǵy álem birinshiliginiń qola júldegeri Sanjar Jabrorovty, karateden úsh dúrkin álem chempıony Saıan Jandildındi, sambodan birqatar respýblıkalyq jáne halyqaralyq týrnırde top jarǵan Ramazan Temirǵalı men Bekarys Shyńǵysbekti, aralas jekpe-jektiń has sheberi Ańsaǵan Qusaınovty kózimiz shaldy. Sondaı-aq qoıan-qoltyq aıqas, grepplıng, brazılııalyq djıý-djıtsýdyń has sheberleri de óz ónerlerin ortaǵa saldy.
Jarys 11 saǵatqa sozyldy. Túski 14:00-de bastalǵan jekpe-jekter 01:00-de aıaqtaldy. Biraq jankúıerlerdiń eshqaısy oryndarynan turyp, tarap ketken joq. «Sádý Arenaǵa» jınalǵan jurt ár aıqasty tapjylmaı tamashalady. Aqyry 32 balýannyń arasynan Azamat Baqytov pen Rýslan Israılov ozyp shyqty. Alǵashqysy – MMA-dan álem chempıonatynyń júldegeri, Azııanyń eki dúrkin chempıony, ekinshisi – brazılııalyq djıý-djıtsýdan álem chempıony, Azııa oıyndarynyń jeńimpazy. Olardyń jasy, salmaǵy jáne boılary da shamalas. Dál sol qos dúldúl «Nomad Wrestling»-tiń tusaýkeser týrnıriniń fınalynda jolyǵyp, sol básekede Baqytovtyń (salmaǵy 90 kg) baǵy janǵan edi. Bıylǵy aqtyq synda da kóreremender ymyrasyz aıqastyń kýási boldy. Ekeýi de sheberliktiń shynaıy úlgisin kórsetti. Desek te qarsylasyna qaraǵanda sál shıraq qımyldap, alǵyrlyq tanytqan 32 jastaǵy Ishki ister mınıstrligi Memlekettik mekemelerdi kúzetý jónindegi mamandandyrylǵan kúzet qyzmetiniń ınspektory Azamat Baqytovtyń asyǵy alshysynan tústi. Ol 10:8 esebimen jeńiske jetti. Sóıtip, qatarynan eki ret bas júldeni oljalaǵan sańlaq «Nomad Wrestling» jobasynyń jetekshisi ári prezıdenti Maqsat Qıqymovtyń qolynan 10 mıllıon teńgeniń sertıfıkatyn aldy. Kúmis medaldy moıyna taqqan 29 jastaǵy Rýslan Israılovqa (salmaǵy 92 kg) 3 mıllıon teńge tabys etildi.
Úshinshi oryn úshin tartys erkin kúresten el chempıony, biraqtar halyqaralyq týrnırdiń jeńimpazy Nurǵalı Nurǵaıypuly (salmaǵy 95 kg) men qoıan-qoltyq aıqastan Azııa chempıony, pankratıonnan álem chempıony Nurtas Jumaǵazyuly (salmaǵy 97 kg) arasynda ótti. Bul básekede Nurǵalıdiń mysy basym boldy. Jarystyń qola júldegeri 1 mıllıon teńgeni qaltasyna basty.
Atalǵan týrnırde 20 jastaǵy Ádilet Ahmetqalıden bastap, 43 jastaǵy Erasyl Abdollaev pen Ańsaǵan Qusaıynov ta kúsh synasty. Sanjar Jabrorovtyń salmaǵy 135 kg bolsa, Islam Mamılov, Ádilet Ahmetqalı, Azat Sadyqov, Ramazan Temirǵalı, Jalǵas Aıdardyń salmaǵy 80 kg-dan ázer asty. Eń eńseli balýandardyń kóshin Rýslan Ábdirazaqov bastady. Talaı dúbirli dodada túıe balýan atanǵan qazaq kúresiniń has sheberiniń boıy 196 santımetr.
Osy joba aıasynda sýper jekpe-jekter de uıymdastyryldy. Sonyń birinde Zámzagúl Faızollanova men Erkejan Erlanova sheberlik baıqasty. Zámzagúl – dzıýdodan elimizdiń 5 dúrkin chempıony, qazaq kúresinen Kóshpeliler oıyndarynyń kúmis júldegeri, aralas jekpe-jekten «Alash Praıdtyń» chempıony. Erkejan – brazılııalyq djıý-djıtsýdan álem chempıonatynyń san márte júldegeri, Azııa chempıony. Bul beldesýde tájirıbeli Faızollanova aıqyn basymdyq tanytty. Báseke aıaqtalǵan bette Zámzagúl áıelder kúresinen álem chempıonatynyń úsh dúrkin fınalısi, bir márte qola júldegeri, Azııa oıyndarynyń fınalısi, Azııanyń tórt dúrkin chempıony Jámılıa Baqbergenovany jekpe-jekke shaqyrdy.
Kelesi kúni «Nomad Wrestling Junior» jarysyn tamashaladyq. Jastar arasynda ótken dúbirli dodada Abdolla Batyrbek dara shyqty. Astanalyq djıý-djıtsý sheberi fınalda elordadan kelgen taǵy bir sportshy, grek-rım kúresiniń ókili Iаkbo Vıllerdi aıqyn utty. Qola medaldy taldyqorǵandyq Álisher Sákimov enshiledi. Úshinshi oryn úshin tartysta ol almatylyq Rafael Orynbaevtan aılasyn asyrdy. Jas órenderdiń jarysynda jeńis tuǵyryna kóterilgen sportshylarǵa 2,5 mıllıon, 1,5 mıllıon jáne 1 mıllıon teńgeniń sertıfıkattary berildi. Biraq syıaqy olardyń qoldaryna berilmeıdi. Uıymdastyrýshylar bul qarajatty keleshekte jas sportshylardyń oqýyna jumsaýdy qup kórip otyr.