Jambyl oblysynyń ákimi Erbol Qarashókeev áleýmettik jelilerde turǵyndar kótergen máselege nazar aýdardy. Máselesi kóp densaýlyq saqtaý salasyndaǵy ózekti problemalardy zerdeleý boıynsha arnaıy keńes ótkizdi, dep habarlaıdy Egemen.kz.
Birer kún buryn áleýmettik jeli paıdalanýshylary Merki aýdandyq aýrýhanasynda kórsetiletin medısınalyq qyzmetterdiń sapasy men mekemeniń materıaldyq-tehnıkalyq jabdyqtalmaýyna qatysty shaǵymdanǵan bolatyn.
Jıynǵa Astanadan QR Densaýlyq saqtaý mınıstriniń tapsyrmasyna sáıkes Jambyl oblysyna QR DSM Medısınalyq jáne farmasevtıkalyq baqylaý komıteti tóraǵasynyń orynbasary Nurlan Aımanov arnaıy kelip qatysty.
Ol Jambyl oblysy ákiminiń tapsyrmasymen qurylǵan arnaıy komıssııany basqarady. Onyń quramyna densaýlyq saqtaý basqarmasy basshylyǵynyń, sanıtarlyq-epıdemıologııalyq baqylaý departamentiniń, «Áleýmettik medısınalyq saqtandyrý qory» KEAQ fılıalynyń, QR DSM Medısınalyq jáne farmasevtıkalyq baqylaý komıteti departamentiniń ókilderi engen.
Komıssııa barlyq kórsetilgen faktiler boıynsha tekserý júrgizedi jáne onyń nátıjeleri boıynsha qorytyndy ázirleıdi. Kináli tulǵalar zań talaptaryna sáıkes jaýapqa tartylatyn bolady.
Oblys basshysy osy jáne ózge túrli keleńsiz jaǵdaılardy boldyrmaý úshin barlyq aýdandyq aýrýhanaǵa tekserý júrgizýdi, jergilikti jerlerdegi jaǵdaıdy egjeı-tegjeıli zerdeleýdi tapsyrdy. Qysqasy, aldaǵy kúnderi aýdandyq aýrýhanalardyń máselesi maı shammen qaralmaq.
Jambyl oblysy