Byltyrdan beri el mektepterinde «Áleýmettik ámııan» atty jańa sıfrlyq júıe synaqtan ótip jatyr. Júıe 5-11 synyptarda áleýmettik kómek alatyn otbasylardyń balalaryna beriletin tegin ystyq tamaqtyń ádil ári ashyq túrde taratylýyn qamtamasyz etýdi kózdeıdi, dep jazady Egemen.kz.
Aıta ketsek, júıe pılottyq rejımde 20 mektepte synnan ótip jatyr: onyń 10-y Astanada, qalǵan 10-y Qostanaı oblysynda ornalasqan. Pılottyq joba – bolashaqta júıeni keń kólemde engizýge daıyndyq júrgizýge múmkindik beredi.
Pılottyq kezeńniń nátıjelerine qaraı, júıeni 1-4 synyp oqýshylaryna da kezeń-kezeńmen engizý josparlanyp otyr.
Atalǵan sıfrlandyrý – jaı ǵana tehnologııa emes, memlekettik kómektiń óz ıesine ádil jetýin kózdeıdi.
«Júıe ata-analarǵa eshqandaı qaǵaz qujat ótkizbeı, balasynyń tegin tamaqtanýǵa quqyǵy bar ekendigi týraly habarlama jiberedi. Ata-ana kelisimin bergen jaǵdaıda, otbasyǵa avtomatty túrde sıfrlyq tamaqtaný vaýcheri qurylady. Bul vaýcherdi ata-ana eGov mobile qosymshasy arqyly iske qosady. Oqýshy mektep ashanasynda arnaıy sáıkestendirý ádisteri – QR-kod, karta nemese Face ID arqyly ystyq tamaq alady. Osydan keıin ata-ananyń telefonyna balasynyń mektepte tamaqtanǵany jóninde habarlama jiberiledi. Júıede keri baılanys fýnksııasy da qarastyrylǵan – ata-ana berilgen taǵamnyń sapasyna baǵa bere alady. Al aıdyń sońynda kórsetilgen naqty qyzmetter negizinde avtomatty túrde oryndalǵan jumystar aktisi jasalyp, jetkizýshige tek naqty qyzmetter úshin tólem júrgiziledi», dep habarlandy Sıfrlyq damý, ınnovasııalar jáne aeroǵarysh ónerkásibi mınıstrliginiń baspasóz qyzmetinen.