Qazaqstan halqynyń birligi kúnine oraı «AMANAT» partııasy Memleket basshysynyń «Taza Qazaqstan» jalpyhalyqtyq bastamasy aıasynda aýqymdy «Birlik aǵashy» ekologııalyq aksııasyn uıymdastyrdy, dep habarlaıdy Egemen.kz
Elimizdiń barlyq óńirin qamtyǵan tazalyq is-sharasy onmyńdaǵan azamattyń basyn qosty. Kaspıı teńiziniń jaǵalaýynan bastap, Ile Alataýynyń shatqaldaryna deıin kóshe men aýla, tarıhı eskertkishter men tabıǵı aýmaqtar tazalandy.
Aksııaǵa elimizdegi partııa belsendileri men jaqtastary, Qazaqstan halqy Assambleıasynyń ókilderi, máslıhat depýtattary, «Jastar Rýhy» jastar qanatynyń músheleri jáne tabıǵatqa beıjaı qaramaıtyn azamattar qatysty.
Astanada partııanyń Atqarýshy hatshysy Dáýlet Káribek «Jastar Rýhynyń» múshelerimen birge Beıbarys Sultan kóshesiniń boıyna aǵash ekti. Ol atalǵan is-sharanyń Qazaqstan halqynyń birligi kúnine oraı uıymdastyrylýynyń máni men mańyzyna toqtaldy.
«Partııamyz Memleket basshysy bastamashylyq etken «Taza Qazaqstan» jobasyna alǵashqy kúnnen bastap belsendi atsalysyp keledi. «AMANAT» partııasynyń muryndyq bolýymen elimizdiń barlyq óńirinde ótkiziletin «Taza beısenbi» ekologııalyq aksııasy bir jarym jyldan astam ýaqyttan beri úzdiksiz jalǵasyn tabýda. Bıyl bul ıgi is-shara Qazaqstan halqynyń birligi kúnimen jáne Assambleıanyń 30 jyldyǵymen tuspa-tus kelip otyr. «Birlik aǵashy» arqyly biz ortaq eńbektiń, azamattyq ustanym men yntymaqtyń úlgisin kórsetemiz. Prezıdent Qasym-Jomart Toqaev aıtyp ótkendeı, «Taza Qazaqstan» – bul tek ekologııalyq naýqan emes, bul – ómir salty. Tazalyq tek qana aınalamyzda emes, oıymyz ben sanamyzda da bolýy qajet», dedi ol.
Aqtaýdaǵy Kaspıı teńiziniń jaǵalaýynda ótken tazalyq aksııasyna 100-ge jýyq adam qatysty. 14-shaǵynaýdan jaǵalaýyndaǵy qoqystar jınalyp, jazǵy maýsymǵa daıyndyq júrgizildi.
Almaty qalasynda tazalyq jumysy Býtakov shatqalynda ótti. Tań biline qoldaryna qolǵap pen qap ustap shyqqan partııalastar, «Jastar Rýhy» jastar qanatynyń músheleri jáne ekologtar, ıaǵnı bas-aıaǵy 50-den astam belsendi tabıǵatty qoqystan tazartty.
Petropavl qalasynda tazalyq jumysy Uly Otan soǵysynda qaza tapqan jaýyngerlerge arnalǵan eskertkish mańynda ótti. Eski qalalyq zırattaǵy memorıaldyń aınalasy retke keltirilip, tazartyldy. Sonymen qatar eskertkish qaıta boıalyp, tarıhı oryn qaıta qalpyna keltirildi. Bul – urpaqtar sabaqtastyǵy men birliktiń jarqyn kórinisi.
Shymkent qalasynda da aýqymdy tazalyq jumysy qolǵa alyndy. Abaı atyndaǵy saıabaqta ornalasqan Dańq memorıalynda «Jastar Rýhynyń» músheleri batyrlarǵa taǵzym etip, patrıottyq tárbıe men ekologııalyq mádenıet úndestiginiń mańyzyn atap ótti. Aıta keteıik, bul jer Jeńistiń 80 jyldyǵyn atap ótetin negizgi oryndardyń birine aınalmaq.
Jalpy, «Taza Qazaqstan» bastamasy qolǵa alynǵannan beri ıgi iske 4 mıllıonnan astam adam qatysty. Osylaısha, 1,5 mıllıon tonnadan astam qoqys jınalyp, 3,3 mıllıonnan astam aǵash egildi. Al «Taza beısenbi» aksııasy aıasynda el aýmaǵynda 1000-nan astam lastanǵan aýmaq tazartylyp, 70 myńnan astam azamattyń qatysýymen 120 myń tonna qoqys jınaldy.
Osyndaı ıgi bastamalar – el birliginiń, azamattyq belsendilik pen ortaq jaýapkershiliktiń jarqyn úlgisi.