Qazaqstanda dári-dármek pen medısınalyq buıymdardy tirkeý merzimin edáýir qysqartatyn «bir tereze» qaǵıdaty boıynsha pılottyq joba iske qosyldy. Jańa bastama Sıfrlyq damý jáne Densaýlyq saqtaý mınıstrlikteriniń birlesken jumysy nátıjesinde júzege asyrylyp otyr, dep habarlaıdy Egemen.kz.
Mınıstrliktiń habarlaýynsha, bul bastama ónimderdiń naryqqa shyǵý merzimin edáýir qysqartyp, qaıtalanatyn ákimshilik rásimderdi joıýǵa múmkindik beredi.
«Qazirgi tańda dári-dármekterge saraptama júrgizý 210 kúnge deıin, baǵa qalyptastyrý – 60 jumys kúnine deıin, al kásibı saraptama – 50 jumys kúnine deıin sozylýy múmkin, al kompozıttik memlekettik qyzmetti qoldaný arqyly bul prosester biriktirilip, parallel túrde 100 jumys kúninen aspaı ótetin bolady», delingen habarlamada.
Aıta keteıik, kompozıttik memlekettik qyzmet erikti ári balamaly negizde engiziledi jáne qoldanystaǵy saraptama, tirkeý jáne baǵa belgileý mehanızmderimen qatar qoldanylady. Sonymen qatar dárilik zattardy Qazaqstannyń ulttyq dárilik formýlıaryna engizý úshin kásibı saraptamadan ótkizýdi de qarastyrady.
Jańa júıe Dúnıejúzilik densaýlyq saqtaý uıymymen birlesken aldyn ala biliktendirý jáne tirkeý rásimderin de qamtıdy. Bul Eýropalyq Odaq, AQSh, Ulybrıtanııa, Japonııa sııaqty qatań retteýshi júıeleri bar elderde tirkelgen dáriler úshin 15 jumys kúnine deıin jedeldetilgen tártipti qoldanýǵa múmkindik beredi. Osyndaı jedeldetilgen merzimder tanylǵan retteýshi júıeleri bar elderde óndirilgen medısınalyq buıymdarǵa da qoldanylatyn bolady.
Pılottyq joba 2025 jyldyń 1 shildesine deıin jalǵasady. Eger onyń tıimdiligi dáleldense, bul model turaqty júıege aınalyp, normatıvtik-quqyqtyq ózgerister engiziledi.