Qazaqstanda 12–16 mamyr aralyǵynda ótken Respýblıkalyq reprodýktıvti densaýlyq aptalyǵy tabysty qorytyndylandy. Bul keń aýqymdy aqparattyq-aǵartýshylyq naýqan Memleket basshysy janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen, sondaı-aq QR Mádenıet jáne aqparat mınıstrliginiń qoldaýymen ekinshi jyl qatarynan uıymdastyryldy, dep habarlaıdy Egemen.kz.
Aıda Balaevanyń aıtýynsha, bıylǵy aqparattyq aptalyq aıasynda otbasyn josparlaý, erler men áıelder densaýlyǵy, adam papıllomasy vırýsynyń jáne jynystyq jolmen beriletin ınfeksııalardyń (JJBI) aldyn alý syndy mańyzdy taqyryptarǵa erekshe kóńil bólingen.
«Aptalyq barysynda 20 myńnan astam is-shara uıymdastyrylyp, shamamen 500 myń adamdy qamtydy. Bul — ótken jylmen salystyrǵanda eki ese kóp kórsetkish. Áleýmettik jelilerde aptalyq heshtegterimen 360 myńǵa jýyq jazba jarııalandy. Buqaralyq aqparat quraldarynda 1,5 myńnan astam materıal jaryq kórdi. Sonymen qatar 78 myńnan astam tegin keńes berilip, 8 myńnan asa JJBI/AITV boıynsha testileý júrgizildi. Bul nátıjeler — Ulttyq komıssııa músheleriniń, memlekettik organdardyń, úkimettik emes uıymdardyń, sarapshylyq jáne ǵylymı qaýymdastyqtardyń birlesken qajyrly eńbeginiń arqasy», dedi Aıda Balaeva.
Mınıstr naýqanǵa belsendi atsalysqan Densaýlyq saqtaý, Oqý-aǵartý, Ǵylym jáne joǵary bilim mınıstrlikteriniń mamandaryna, sondaı-aq BUU halyqtyń qonystanýy salasyndaǵy qory (IýNFPA), Dúnıejúzilik densaýlyq saqtaý uıymy (DDU), IýNESKO sııaqty halyqaralyq seriktesterimizge jáne otandyq úkimettik emes uıymdarǵa — KARM, Saulyq LIFE, YPEER, Ulttyq volonterlik jeli men basqa da seriktesterimizge shynaıy alǵys aıtty.
«Biz ortaq maqsat — keleshek urpaqtyń saýlyǵy úshin tıimdi vedomstvoaralyq ózara is-qımyl úlgisin kórsete aldyq. Bul nátıjeler – barlyq seriktesterimizdiń qajyrly eńbeginiń jemisi. Barshańyzǵa úlken raqmet!» dedi mınıstr.
Onyń aıtýynsha, Ulttyq komıssııa reprodýktıvti densaýlyq mádenıetin damytý isin ári qaraı da basty nazarda ustaıtyn bolady. О́ıtkeni tek aqparattandyrylǵan, densaýlyq máseleleri jaıly ashyq sóılese alatyn jáne sanaly sheshim qabyldaıtyn qoǵam ǵana deni saý urpaqty tárbıeleı alady.