Elimizdiń temirjol jelisinde jolaýshylar úshin qolaıly jańa baǵyttar iske qosylady, dep habarlaıdy Egemen.kz.
Temirjol jáne sý kóligi komıtetiniń tóraǵasy Jánibek Taıjanovtyń habarlaýynsha, 2025 jyldyń shilde aıynan bastap Astana men Qaraǵandy arasynda júrdek elektr poıyzy qatynaı bastaıdy.
«567 orynǵa arnalǵan bul zamanaýı poıyz jolaýshylarǵa jaıly ári jyldam qatynaý múmkindigin usynady. Al bıylǵy kúzde Astana men Býrabaı kýrorttyq aımaǵy arasynda jańa elektr poıyzy jolǵa shyǵady. Jol júrý ýaqyty – shamamen 2,5 saǵat, al poıyz 360 jolaýshyǵa arnalǵan», dedi Jánibek Taıjanov.
Sonymen qatar, bıyl 226 jańa jolaýshylar vagonyn satyp alý josparlanǵan.
«Buǵan deıin jyl saıyn 150-180 vagon alynǵan bolsa, 2029 jylǵa deıin jyl saıyn 200-den astam vagon satyp alynady. Bul elimizdiń jolaýshylar vagony parkin tolyǵymen jańartýǵa jol ashady», delingen habarlamada.
Aıta keteıik, Stadler Kazakhstan zaýyty da 2024 jyldan bastap jolaýshylar vagondaryn shyǵarýdy bastaǵan.