Keıingi jyldary Densaýlyq saqtaý mınıstrligi salany sıfrlandyrýǵa kóp kóńil bóldi. Nátıjesinde dárigerge jazylý kezegi azaıady, qarjyny tıimdi basqarýdyń múmkindigi artady, medısınalyq qyzmetter burynǵydan qoljetimdi bolady dep topshylady, dep jazady Egemen.kz.
Densaýlyq saqtaý júıesin sıfrlandyrý salaǵa tek jańa tehnologııalardy engizý degen sóz emes. Bul – medısınalyq kómektiń sapasyna, azamattarǵa kórsetiletin qyzmetterdiń qoljetimdigine tikeleı áser etetin strategııalyq baǵyt. Sonymen qatar densaýlyq saqtaý salasyndaǵy qarjylandyrýdyń tıimdiligin qamtamasyz etýge múmkindik beretin tetikterdiń biri. Búginde elimizde memlekettik bıýdjet jáne Medısınalyq saqtandyrý qorynyń qarjylandyrýy arqyly 1900-ge jýyq medısınalyq uıym jumys isteıdi. Osy uıymdar 20 mln astam otandasymyzǵa medısınalyq kómek kórsetedi. Sonyń ishinde dınamıkalyq baqylaýdaǵy jáne áleýmettik osal toptardaǵy 700 myń azamat bar. Olarǵa 19 mln astam tegin dárilik resepter berilgen. 370 myńǵa jýyq áıelge júktiligine baılanysty tıisti medısınalyq qyzmetter kórsetiledi. Jýyrda ótken baspasóz máslıhatynda Densaýlyq saqtaý vıse-mınıstri Erbol Ospanov sıfrlandyrý bastamalary jaıynda aıtyp berdi.
«Birinshi joba – pasıentterdi sıfrlyq sáıkestendirýge qatysty. Byltyr biz bul jobany pılottyq rejimde iske asyrǵanbyz. Osyǵan qazirdiń ózinde 1 800-den astam medısınalyq uıym qosyldy. Júıeni kún saıyn 80 myńnan astam qyzmetker paıdalanady. Jyl basynan beri olar 66 mln astam qabyldaý ótkizdi. Nátıjesinde medısınalyq qyzmetter kólemi 11,5%-ǵa azaıdy. Júıe zańsyz kórsetiletin qyzmettiń kólemin azaıtty. Qarjy jaǵynan bul 2,5 mln teńgege deıin únemdeýge múmkindik berdi», dedi E. Ospanov.
Medısınalyq qyzmetkerler túrli aqparattyq júıelerdegi qujattardy nemese qaǵaz qujattardy toltyrýǵa kelgende kóp ýaqyt jumsaıdy. Osyǵan oraı, medısınalyq aqparattyq júıelerdi ıntegrasııalaý jáne modernızasııalaýdyń arqasynda medısına qyzmetkeriniń júktemesi 40%-ǵa azaıǵan. Osyǵan deıin dárigerler 4 aqparattyq júıede jumys istese, qazir bir ǵana júıeni paıdalanady. Sondaı-aq medısınalyq qujattar, anyqtamalar sıfrlyq formatqa aýystyrylyp jatyr. Qazir 5 qujat sıfrlyq formatta usynylady. Osy jyly taǵy 3 qujat sıfrlyq formatqa aýysady eken. Buryn tek qaǵaz júzinde resimdelgen medısınalyq anyqtamalar, mysaly, 073/ý (kólik júrgizý úshin), 075/ý (medısınalyq tekserý), balanyń densaýlyq pasporty jáne jeke jumysshylarǵa arnalǵan medısınalyq kitapshalar endi elektrondy formatta qoljetimdi. Olardy eGov arqyly alýǵa bolady. Bul – zańsyz berilip jatqan qujattar aınalymyn qysqartýǵa múmkindik beredi. Sıfrlandyrý baǵytynda iske asyp jatqan jumystardyń jón-jobasy osyndaı.