Magnıtýdasy 5,8 ball bolǵan jerasty dúmpýi Muǵla provınsııasynda, ásirese Marmarıs qalasyna jaqyn aýmaqta qatty sezilgen, dep habarlaıdy Egemen.kz TRT Haber basylymyna silteme jasap.
AFAD taratqan málimetke sáıkes, jer silkinisiniń epısentri Jerorta teńizinde ornalasqan. Dúmpýdiń tereńdigi 67,91 shaqyrymdy qurasa, jerge eń jaqyn núkte — Marmarıske qarasty Muǵla aımaǵy, ol epısentrden nebári 10,43 shaqyrym qashyqtyqta jatyr.
Apat saldarynan 1 adam kóz jumyp, 69 adam ártúrli deńgeıde jaraqat alǵany habarlandy. Qaýipsizdik maqsatynda jergilikti turǵyndar saıabaqtar men ashyq alańdarǵa shyqqan.
Muǵla provınsııasynyń gýbernatory Idrıs Akbıik zilzala qala tirshiligine aıtarlyqtaı áser etpegenin aıtty. Elektr energııasy, tabıǵı gaz, aýyz sý jáne káriz júıeleri qalypty rejımde jumys istep tur. Sondaı-aq turǵyn úılerde qurylymdyq zaqymdanýlar anyqtalmaǵan.
Qazirgi tańda qutqarý jáne tekserý jumystary jalǵasyp jatyr. Arnaıy mamandar turǵyn úıler men ınfraqurylym nysandaryn egjeı-tegjeıli baqylap, jaǵdaıdy baǵalaýda.