Búgin Astanadaǵy Kinopark 8 IMAX Saryarka kınoteatrynda otandyq «Altyn adam» anımasııalyq fılminiń alǵashqy jabyq kórsetilimi ótti. Is-sharaǵa balalar, ata-analar, BAQ ókilderi men kıno salasynyń mamandary qatysty. Bul týyndy tek anımasııalyq joba ǵana emes, tól tarıhymyzdy tanýǵa, ulttyq qundylyqtardy boıǵa sińirýge baǵyttalǵan tárbıelik máni zor mádenı bastama retinde usynylyp otyr, dep jazdy Egemen.kz.
Fılm Sháken Aımanov atyndaǵy «Qazaqfılm» ulttyq kınostýdııasynda, QR Mádenıet jáne aqparat mınıstrliginiń tapsyrysy boıynsha jáne Ulttyq kınony qoldaý memlekettik ortalyǵynyń qoldaýymen túsirilgen.
«Bul anımasııalyq fılmniń tárbıelik máni óte joǵary. Sebebi búginde qazaqı ári tarıhı mýltfılmder az. Kóbinese balalarǵa arnalǵan kontent oryssha shyǵyp jatyr, bul búldirshinderdiń tiliniń de sol baǵytta qalyptasýyna áser etýde. Sondyqtan ulttyq anımasııany qoldaý óte mańyzdy. Mádenıet jáne aqparat mınıstrliginiń tapsyrysymen, Ulttyq kınony qoldaý ortalyǵynyń qoldaýymen Qazaqfılm osyndaı mańyzdy týyndyny jaryqqa shyǵardy. Bul baǵyttaǵy jumys jalǵasýy tıis», dedi «Qazaqfılm» ulttyq kınostýdııasynyń baspasóz bóliminiń basshysy.
Anımasııalyq lentada kóne saq jaýyngeri Ańkyldyń «Máńgilik Otty» izdep, Han Táńiri shyńyna attanǵan sapary sýretteledi. Jol boıy ol túrli synaqtardan ótip, erlik pen rýhanı kemeldikti tanyp, shynaıy batyrlyqtyń maǵynasyn ashady. Fılm tarıhı jáne kórkem turǵydan úndesip, kórermenge ulttyq bolmys pen rýh jaıly tereń oılanýǵa múmkindik beredi.
Fılmniń ssenarıı avtory, jazýshy Ularbek Nurǵalymuly «Altyn adam» týyndysynyń tek anımasııalyq emes, tarıhı sıpatqa da ıe ekenin erekshe atap ótti.
«Jalpy muny tarıhı fılm dep te aıtýǵa bolady. Sebebi Altyn adam – tarıhı tulǵa. Búginge deıin biz onyń syrtqy kelbetin, kıiminiń altynnan ekenin álemge kórsettik. Al bul fılmde rejısserdiń negizgi ıdeıasy – onyń ishki altynyn, ıaǵnı rýhanı baılyǵyn kórsetý boldy. Bizdegi tabylǵan Altyn adamda tórt jebe bar. Biz olardy adamnyń boıyndaǵy erlik, parasat, ádildik jáne izgilik dep sıpattadyq. Fılmde úsh jebe beınelengen, al basty keıipker tórtinshi jebeni – izgilikti izdeıdi. Bul sapar arqyly rýhanı jetilý joly sýretteledi. Kóshpendiler dúnıetanymynda jaýdy syrtynan atpaıdy. Erlik uıyqtap jatqanda parasat ony oıatpaı óltirmeıdi. Qaıta oıatyp, teń dárejede shaıqasady. Keıin erlik, parasat jáne ádildik úsheýi birigip, izgilikti izdeýge attanady. Bul – naǵyz ishki kúrestiń kórinisi. Basty maqsat – boıynda osy tórt qasıet toǵysqan naǵyz Altyn adamnyń qandaı bolatynyn kórsetý», dedi ssenarıı avtory.
Kórsetilimge balasymen kelgen analardyń biri fılmniń bala sanasyna áseri men qazaq tilindegi sapaly kontenttiń mańyzdylyǵyna toqtaldy.
«Mýltfılm óte unady. Ásirese qazaq tilinde bolǵany qýantty. Qazir balalarymyz kóbine batystyq mýltfılmderdi kórip, solardyń keıipkerlerine eliktep ósip jatyr. Al Altyn adam – jaı ǵana ańyz emes, qazaq tarıhyndaǵy naqty tulǵa. Balalarymyzdyń sanasyna osyndaı keıipkerler arqyly ulttyq rýhty sińirsek, bul – bolashaqqa salynǵan úlken jol. Osyndaı óz batyrlarymyz jaıly taǵy da kóp mýltfılmder túsirilse eken degen analyq tilegim bar».
Fılm barlyq kórermenniń ystyq yqylasyna bólenip, rejısserler men sýretshiler eńbegi joǵary baǵalandy.