Sýarý maýsymy bastalǵan sáýir aıynan búginge deıin Qyrǵyz Respýblıkasynan Shý jáne Talas ózenderi arqyly 304,3 mln tekshe metr sý kelgen, dep habarlaıdy Egemen.kz.
Búginde Jambyl oblysynyń sharýa qojalyqtaryna 231 mln tekshe metrden astam sý berilgen. Bul byltyrǵy jylmen salystyrǵanda 50 mln tekshe metrge artyq. Jalpy 58 900 gektar egis alqaby sýarylǵan.
Sala mınıstrliginiń málimetinshe Qyrǵyz Respýblıkasymen jasalǵan kelisimderge sáıkes, vegetasııalyq kezeńde Qazaqstanǵa Jambyl oblysynyń dıqandaryn qamtamasyz etý úshin Shý jáne Talas ózenderi arqyly 625 mln tekshe metr sý keledi dep kútilip otyr.
Sý resýrstary jáne ırrıgasııa birinshi vıse-mınıstri Nurlan Aldamjarovtyń aıtýynsha óńirde sýarmaly sýdy tıimdi paıdalaný jáne ádil bólý baǵytyndaǵy jumystar jalǵasyp jatyr.
«Kanaldar boıynsha sýdy kezekpen berý kestesi bekitildi, dıqandarǵa ylǵaldy az qajet etetin daqyldarǵa kóshý men túngi sýarý jaıynda túsindirý jumystary júrgizilip jatyr. Sondaı-aq Fýrmanov aınalma kanaly men Georgıev magıstraldyq kanalynda mehanıkalyq tazartý jumystary bastaldy», dedi N.Aldamjarov.